Атырау облысының әкімі Досмұхамбетов: «Бағаны қатаң реттеу мүмкін емес, онда сауда құлдырайды»

Бүгін, 18 маусымда Атырау облысының әкімі Махамбет ДОСМҰХАМБЕТОВ Орталық коммуникациялар қызметінде өңірдің әлеуметтік-экономикалық дамуы туралы әңгімелеп, содан кейін журналистердің сұрағына жауап берді. Бұл шараның қызықты жері де осы сұрақтарға берілген жауаптар болды.

Оның бұрынғы бірінші орынбасары Нұрлан ТАУБАЕВҚА қатысты сот процесі туралы сұраққа Досмұхамбетов сот процесінің барысы туралы түсінік бере алмаймын деп жауап берді.

- «Мемлекеттік қызмет туралы» заңға сәйкес, әр басшы, егер оның қарамағындағы қызметкер сыбайлас жемқорлыққа кінәлі деп айыпталып, оның кінәсі сотта расталса, отставкаға кетуі тиіс. Мен заңға сәйкес әрекет етемін.

Әкімнің отбасы ай сайын тамаққа қанша жұмсайтыны туралы сұраққа:

- Мен Атырауда тұрамын, бірақ балаларым ер жеткен, олар Нұр-Сұлтанда тұрады, немерелерім де. Жұбайым кейде олармен, кейде менімен бірге тұрады. Мен үйден тамақтанбаймын.

Соңғы рет қашан Атырауды аралап, қала тұрғындарының мәселелерімен таныстыңыз деген «АЖ» сұрағына:

- Қызық сұрақ. Мен қалада күн сайын жүремін, көбіне жұмыста боламын, кабинетте отыруды қажет ететін жұмыс бар. Сондай-ақ объектілермен танысамын, қаланы аралап, не істеліп жатқанын көремін. Қалада не болып жатқанын көріп жүрсіз бе деп сұрағыңыз келетін болар. Соңғы қабылдаулардың бірінде бір әйел Талғайраңға баратын жолдар баяу салынып жатыр деп шағымданды. Сол жерден өттім, сапалы жолдар салынып жатыр. Дүйсенбі күні Сасықсайдағы жұмыстың қалай жүріп жатқанын білуге бардым, ҚТС және басқа нысандарды араладым. Әрине, проблемалар бар, бірақ өзгерістер де бар, мысалы, қала тазарып қалған.

Азық-түліктің, әсіресе картоп пен сәбіздің бағасына қатысты, әкім жағдайды қадағалап отырмын деп жауап берді:

- Қазір маусымаралық кезең. Картоп пен сәбіздің бағасы көтеріліп жатыр. Біз картопты еліміздің оңтүстік облыстары мен Ресейдің көршілес өңірлерінен әкелу шараларын алып жатырмыз. Картоп бағасының арзандағанын айта кету керек, қазір ол бөлшек саудада 310 теңге тұрады. Сәбіз бағасы да төмендейді деп күтеміз. Маусым айының соңында өзіміздегі өнім жиналады, жергілікті шаруалармен келісім бар. Өңір өз картобымен 44 пайызға ғана қамтылған, бізде көкөніс егетін үлкен аумақ жоқ, сондықтан көп өнімдер сырттан әкелінеді. Бағаны қатаң реттеу де мүмкін емес, онда сауда құлдырайды.

М.Досмұхамбетов экология, вакциналау, жолдар және т.б. бірқатар сұраққа жауап берді.

Нұргүл ХАЙРУЛЛИНА