Мұғалімдер вакцина салдыруға асығар емес

Өңірімізде тұрғындарды Covid-19-ға қарсы жаппай вакциналау жалғасуда. 16 маусымда облысқа ресейлік «Спутник V» вакцинасының екінші компонентінің сертификаттары келді.

1 ақпаннан бастап 104 200 доза вакцина алынды, оның ішінде 92 700-і «Спутник V», 2000-ы «QAZVAC», 9500-і «Hayat-Vax». Олардың бірінші компонентімен 67 539 адам, екіншісімен 23 614 адам егілді. Соңғы кездері бірінші компонент алған Атырау облысының тұрғындары екінші компоненттің кешіккеніне қатты алаңдады. Дәрігерлер екі екпені алу арасындағы алшақтық 90 күнге дейін болады деп айтқанымен, пациенттер екінші вакцинаны ектіруді кешіктіргісі келмеді. Бастапқыда колл-орталықтың қызметкерлері компонент бірер күнде түседі деп шыдамдылықпен түсіндірді, кейін қоңырауларға жауап беруді тоқтатты.

- Екінші компоненттің 39 850 дозасы облысымызға жеткізілді, бірақ біз бұл партияға сәйкестік сертификаттарын күткен едік, - деді денсаулық сақтау басқармасының штаттан тыс бас эпидемиологы Гүлжаман ТАУБАЕВА кешігу себебін сұрағанымызда. Екінші компонентті бірінші екпені алған 35 582 пациент асыға күтті. 2990 адамда екпе алғанына 21 күн, ал 32 592 адамда 45 күн болған. Естеріңізге салсақ, өңірде барлығы 31 стационарлық және 10 көшпелі вакциналау пункті бар. Денсаулық сақтау басқармасы баспасөз қызметінің хабарлауынша, тек 15 маусымда  жергілікті 953 тұрғын «Спутник V», «QAZVAC» және «Hayat-Vax» вакциналарының бірінші компонентін ектірген. Денсаулық сақтау министрлігі 8 басым топты белгіледі. Олар - медицина қызметкерлері, педагогтар, полиция қызметкерлері, ҰҚК қызметкерлері, диспансерлік науқастар және т.б. екені белгілі. Облысымызда полицейлер ең «саналы» топ болып шықты, олар бүкіл құрам дерлік ектірді. Екінші орында медицина қызметкерлері (80% -дан жоғары); педагогика қызметкерлері әзірге сақтық танытып отыр.

- Мен вакцина салдырған ұжымдармен сөйлестім. Әдетте, ұжымның үштен бір бөлігі ектіреді. Басқалары неден қауіптенеді деп сұраймын. Олар біреуі қант диабетімен ауырады, енді бірінің қан қысымы, басқасының созылмалы ауруы бар дейді. Міне, ең алдымен сол адамдар коронавирус үшін ең осал нысан екені туралы есеп беруіміз керек, - дейді денсаулық сақтау басқармасының басшыcы Асхан БАЙДУӘЛИЕВ. – Олар, әрине, дәрігермен кеңескеннен кейін екпе алуы керек. Осылайша, олар өздерін вирустан және оның зардаптарынан қорғай алады.

Зульфия ИСКАЛИЕВА