Жұлдыз ықшамауданындағы жол-көлік оқиғасы кісі өлімімен аяқталды

15 маусымда кешкі сегіз шамасында Атыраудағы Жұлдыз ықшамауданында жол-көлік оқиғасы орын алды. Toyota Hiace және «ВАЗ 21113» көліктері соқтығысып, нәтижесінде «Хайс»-тың 33 жастағы жолаушысы көз жұмды, тағы екі адам облыстық ауруханаға жеткізілді.

Ауыр жарақат алған 22 жастағы «ВАЗ 21113» жолаушысы жан сақтау бөлімінде, Toyota Hiace жолаушысы нейрохирургия бөлімінде ем алуда. Екі жүргізуші де ауруханаға жатудан бас тартты.

- ҚР Қылмыстық кодексінің 345-бабының 3-тармағы бойынша (Көлiк құралдарын басқаратын адамдардың адам өліміне әкеп соққан жол жүрісі құралдарын пайдалану қағидасын бұзуы) сотқа дейінгі тергеу басталды, - деп хабарлады «АЖ»-ға Атырау облысының полиция департаменті.

Фархат ӘБІЛОВ