Әуезов көшесін қалпына келтіру қанша тұрады?

«AЖ» 2,8 шақырымдық Әуезов көшесін қалпына келтіруге 3 миллиард 227 миллион теңге бөлінгенін білді. Айта кету керек, қала әкімдігі бұған дейін жобаның құнын жарияламаған болатын.

Тапсырыс беруші - қалалық ТКШ бөлімі, мердігер - «АтырауИнжСтрой» ЖШС. Қалпына келтіру биылғы қыркүйектің соңына дейін аяқталуы тиіс. Ал мониторинг барысында жетіспеушілік анықталды.

- Техникалық қадағалау және Жол активтерінің ұлттық сапа орталығы қызметкерлері 630 метр жол жиегінің толық бекітілмегенін анықтады, - деп хабарлады Жол активтері ұлттық сапа орталығының Атырау филиалы.

Бұдан бұрын «AЖ» хабарлағандай, Әуезов көшесін қалпына келтіру сәуірдің аяғында басталды. Жол қызметкерлері алдымен «Молекула» композициясын алып тастады, содан кейін жол белгілері мен тақталарын бөлшектеуге кірісті. Сондай-ақ, бұдан бұрын арнайы техниканың көмегімен жол жиегінде өскен көпжылдық ағаштарды басқа жерге көшіре бастады, бірақ жұртшылықтың наразылығынан кейін бұл жұмыс тоқтатылды.

Естеріңізге салсақ, Атырауда Г.Канцев көшесін қалпына келтіру жұмыстары жалғасуда: ұзындығы 1,26 км учаскеге 1,4 млрд теңге бөлінді.

Фархат ӘБІЛОВ