В Атырау
+9 
27 сәуірде «Мұнай Көлік» ЖШС жұмысшылар тобы кеңсе жанында наразылық акциясына шықты. Басты талап - жалақыны көтеру, оның үстіне, жиналғандардың пікірінше, басшылықтың осындай мүмкіндігі бар.
«Мұнай Көлік» мұнай өндірісі бойынша мердігер: жүктерді тасымалдайды, арнайы жабдықпен техникалық қолдау көрсетеді.
Жүргізуші Арман ШӘКИЕВ:
- Отбасымыз, балаларымыз, несиелеріміз бар, ақша жетпейді. Біздің кейбір қызметкерлер соңғы 6-7 айда жұмыссыз жүр, ал басшылар мұны «көлемнің» жоқтығымен түсіндіреді, ал іс жүзінде жеке кәсіпкерлермен жұмыс істейді.
Бұдан басқа, Шакиевтің айтуынша, ЖШС басшысы жұмысшыларға техника бұзылып қалған жағдайда оны өз есебінен жөндейтіндерін ескерткен:
- Егер біз келіспесек, онда жұмыстан шығарамыз деп қорқытады. Алдыңғы басшының кезінде мұндай келіспеушіліктер болған жоқ, жаңа басшы тағайындала салысымен проблемалар басталды.
Оны басқа жұмысшылар да қолдады - олар неліктен төмен жалақымен жұмыссыз үйде отырғандарына, ал «көлемнің» басқаларға кетіп жатқанына түсінбейді.
- Мен 8 айдан бері жұмысқа шақыру күтіп жүрмін, ал олар әлі пандемияға сілтейді, мұны қалай түсінуге болады? – дейді Әділбек РЫСҚАЛИЕВ ашуланып.
Осы уақытта «Мұнай көлік» ЖШС бас директоры Самат САРТАЙ жиналғандарға жақындап, бәрі заң шеңберінде жасалып жатқанын мәлімдеді.
- Біз пандемияға байланысты толық жұмыс көлемін ала алмадық. Тиісінше, бәріне бірдей жұмыс жоқ. Ал басқа жеке кәсіпкерлерді техникамыздың күші жетпей жатқан жағдайда тартамыз, - деді Сартай. Оған қоса, ол қысқартуға ілігетін 52 жұмысшының тізімі әзірленіп жатқанын айтты.
Еңбек инспекциясы ақпан айында осы ЖШС жұмысшыларынан ұжымдық арыз түскенін хабарлады. Сол кезде тексеру нәтижелері бойынша ЖШС басшылығына 150 АЕК көлемінде әкімшілік айыппұл салынып, 1,3 млн көлемінде жалақы төлеу туралы ұйғарым шығарылған. Ал осы жағдаймен қазір салалық кәсіподақ ұйымы айналысуда.
Нұргүл ХАЙРУЛЛИНА