Қызыл аймақ: Атырау қаласында COVID-19​ жұқтырғандар көбейіп келеді

Тек бір тәулік ішінде Атырауда коронавирус инфекциясын жұқтырған 51 жағдай расталды, деп хабарлайды Атырау облысы денсаулық сақтау басқармасының баспасөз қызметі.

Жалпы, облыста Covid-19 жұқтырған 75 адам анықталды. Оның ішінде 51 науқас Атырау қаласынан тіркелді, ал скрининг нәтижесінде Теңіз кен орнынан 10 адам анықталды, яғни коронавирус жұқтыратындар азайды. Есесіне облыс орталығында инфекция жұқтыру ошағы көбеюде.

Сонымен қатар, Жылыой ауданының 2 тұрғыны, Индер ауданының 1 тұрғыны, Құрманғазы ауданының – 5 және Махамбет ауданының 6 тұрғыны коронавирус жұқтырған.

48 науқастың бойында ауру белгілері байқалады, ал 27 адамда белгі жоқ.

Сонымен қатар, кеше облыста 67 жергілікті тұрғын коронавирус инфекциясынан емделіп шықты.

Қазір 242 адам үйден ем қабылдап жатыр, 147 науқас модульді стационарда, 37-сі аудандық жұқпалы аурулар ауруханасында, 266-сы Теңіз кен орнындағы жұқпалы аурулар ауруханасында емделіп жатыр. COVID-19 таралу қарқыны бойынша Атырау облысы «қызыл» аймақта орналасты.