В Атырау 0 
Коронавирус жұқтырғандар санының өсуіне қарамастан, модульді инфекциялық ауруханада ешқандай алаңдаушылық жоқ. Онда 200 төсектік орын бар, қазір 109 науқас емделіп жатыр.
Бұл туралы бізге Сарыөзектегі модульді аурухана қарайтын №2 облыстық аурухана директоры Мағжан СИДЖАНОВ айтты. Оған әлеуметтік желіде тараған аудио хабарлама себеп болды: сонда бір әйел ковид жұқтырған науқастардың көптігінен жедел жәрдемге мұқтаж адамдарды қабылдау бөлімшесіндегі қызметкерлер қабылдап үлгере алмай жатыр деп сендірді. М.Сиджановтың айтуынша, 20 наурыздан бастап №2 облыстық аурухана (Нұрсая ықшамауданындағы) өз бағытында қолданылып келеді. Онда гепатит, өткір ішек инфекциялары бар, уланған науқастар емделуде. Ковидпен ауырған науқастың бәрі модульді ауруханаға ауыстырылды. Тек ауыр халде жатқан 8 науқасты орнынан қозғаған жоқ. Онда 200 төсектік орын бар, оның ішінде 20 жан сақтау бөлімшесінде. Осылайша, қазір №2 ауруханада 63 науқас, ал Сарыөзекте 109 науқас коронавирустан емделіп жатыр.
- Әзірге анықталған ковид жұқтырған 83 адамның 54-і Теңіз кенішінен. Қала тұрғындарының ішінде індет анықталған 26 адамның көбінде аурудың белгілері байқалмайды, сәйкесінше олар үйде емделеді. Осылайша, модульді инфекциялық ауруханаға түсіп жатқан науқастар легі көп емес, - деп сендірді облыстық денсаулық сақтау басқармасының баспасөз қызметі.
Зульфия ИСКАЛИЕВА
Суреттерді түсірген Нұрбейбіт НҰҒМАНОВ