Атыраудағы митинг: құлақ түбіндегі дауыс зорайтқыш және «жаңа тілшілер»

Бүгін, 7 наурызда сағат 12-де 30 шақты адам Атыраудағы Исатай мен Махамбет орталық алаңына жиналды. Олардың тек оны ғана Макс Боқаев бастаған белсенділер, қалғандары - "штаттық" киімдегі адамдар мен бейнекамералары бар сары жилет киген бізге бейтаныс «бұқаралық ақпарат құралдарының өкілдері».

Ол жерде, өткен жолғыдай, қолдарына дауыс зорайтқыш ұстаған облыс прокурорының орынбасары Бауыржан ЖҰМАХАНОВ пен облыстық ішкі саясат басқармасының бастығы Қанат ӘЗМҰХАНОВ болды. Олар кезек-кезекпен митинг қалалық әкімдікпен келісілмегендіктен белсенділерді алаңнан кетуге шақырып, әйтпесе әкімшілік жауапкершілік қарастырылғанын ескертті. Олар сөздері естілмейтіндей қылып, сөйлеп тұрған Боқаевқа жақын келді (мегафонның дыбысы зор еді).

Боқаев серіктерімен бірге алаңнан кеткеннен кейін, біз митингте оған дұрыс айтуына мүмкіндік бермеген нәрсесін білмек болып тілдескен едік.

- Бізге жаңа конституция қажет. Ол үшін құрылтай өткізу керек. Құрылтай ұйымдастыру үшін ұлттық ымыра қажет. Егер осы үш қадамды жасасақ, онда біз жер мәселесін 90% -ға шешеміз, - дейді М.Боқаев. - Бүгін біз митингті тек жер мәселесіне арнағымыз келді, бірақ бізге мүмкіндік бермеді, оны өздеріңіз көрдіңіздер. Бірақ бұдан проблема жойылмайды. Полигондарды жапқан жоқ, жаңа Жер кодексін қабылдаған жоқ, ірі мұнай және уран кен орындары мен басқа жер асты байлықтары шетелдіктердің қолдарында. Олармен жасалған келісімшарттар әлі  жабық, оларды ашу қажет. Мысалы, Байқоңыр Ресейге жалға берілді, бірақ бұл келісімшарт әлі жабық. Егер біз жерді игеретін болсақ, инфрақұрылым қажет. Мысалы, Қызылқоға және Құрманғазы аудандарына бару мүмкін емес, себебі жол жоқ. Бостан босқа ысырап болып жатқан қаражатты сол жолды салуға жұмсау керек. Бұдан басқа, 2012 жылы мен еліміздің Солтүстік және Шығыс өңірлеріндегі құнарлы жерлерді игеруді ұсындым. Билік ірі мұнай компанияларының көмегімен көшкісі келетіндерге жағдай жасай алар еді, мысалы, жұмыссыздық деңгейі жоғары Жаңаөзен мен Атыраудан көшкісі келетіндер аз болмас еді. Ол жерден фермалар ашып, ауыл шаруашылығын дамытуға болар еді. Осындай жолмен жер мәселесінің шешімін табуға болар еді. Мен бүгін алаңда үлгергенімше айттым. Енді мұнда уәде еткенімдей 14 наурызда келемін.

- Сіздің бастапқы талабыңыз жерді шетелдіктерге сатуға мораторийді ұзарту болды. Президент, 28 ақпанда өткен митингіден сәл бұрын, дәл осы нормамен жаңа Жер кодексін қабылдауды тапсырды.

- Егер мен Тоқаевты дұрыс түсінсем, ол жерді шетелдіктерге сатпаймыз және бұл үшін жеке заң қабылдаймыз деді. Егер бұл заң 2016 жылы қабылданған болса, онда оны орынды және уақытылы деп айтуға болар еді. Бірақ қазір бұл жеткіліксіз деп ойлаймын. Бізге жаңа Конституция қажет, ал жаңа Жер кодексінің бірінші бөлімінде жер шетелдіктерге сатылмайды, сонымен қатар жалға берілмейді деп жазылуы керек. Егер біз ақшаны Экспо, ЛРТ, тутұғыр және сол сияқты нәрселерге жұмсамасақ, байтақ кеңістігімізді дамыту үшін өз қаражатымыз жеткілікті болар еді.

Айнұр САПАРОВА

Суреттер мен бейнежазбаны түсірген автор және Нұргүл  ХАЙРУЛЛИНА