В Атырау +2 
Үш күн ішінде полицейлер мен қала әкімдігі қызметкерлерінің қатысуымен мониторинг тобы Атырауда карантин режимі бұзылған 20 шақты жағдайды анықтады.
Атырау облысының бас санитар дәрігерінің 2021 жылғы 21 қаңтардағы №1 қаулысына сәйкес, қоғамдық тамақтану объектілеріне тек сағат 20:00-ге дейін жұмыс істеуге рұқсат етілетіні белгілі (ұжымдық іс-шаралар өткізілмейді, бір уақытта келушілер саны 30 адамнан аспайды).
Полиция департаментінің баспасөз қызметі хабарлағандай, 29 қаңтарда сағат 22:45-те «Вивальди» мейрамханасы, сағат 21:40-та «ChechilPub» бары, сағат 23:30-да «Urban» мейрамханасы ашық тұрды. Сол күні «Марокко» мейрамханасында 50 шақты адам болған. 30 қаңтарда сағат 23:30-да «Родем» мейрамханасы ашық болды. Ал «Аспандияр» мейрамханасында 50-ге жуық адам қатысқан банкет өтті. Келушілер саны «Кәусар» және «Сұлтан Холл» мейрамханаларында да шамадан тыс болғаны анықталды.
31 қаңтар жексенбіде «ПерсонаА» киім дүкені және «Белуччи» әйелдер киім дүкені ашық болды. Алайда азық-түлік емес дүкендерге тек жұмыс күндері жұмыс істеуге рұқсат етілген.
Тағы бірқатар заң бұзушылықтар анықталды. Жиналған материалдар қалалық санитариялық-эпидемиологиялық қадағалау басқармасына шаралар алу үшін жіберілді.
Дайындаған Айнұр САПАРОВА