8 желтоқсанда Атыраудағы тергеу изоляторында рентген аппараты арқылы сәлемдемелерді тексеру кезінде ыстық тамақтың ішіне жасырылған 4 ұялы телефон табылды. Бұл сәлемдеме есірткі мен қаруды заңсыз сақтағаны үшін істі болған күдіктіге арналғаны анықталды.
- Мекеме қызметкерлерінің қырағылығының нәтижесінде заңсыз сәлемдеме иесіне жетпей, заң бұзушылық дер кезінде анықталды. Қазір 24 жастағы «курьер» ұсталды. Тексеру жұмыстары жүргізіліп жатыр, - дейді тергеу изоляторының күзет және режим бөлімінің бастығы Асылбек РАХМАНОВ.
Қазіргі уақытта тергеу изоляторына әкелінетін барлық сәлемдеме «Адани» рентген аппараты арқылы тексеріледі, бұл заңсыз сәлемдемелердің тиімді анықтауға мүмкіндік береді.
- Өткен аптада ішіне жасыл түсті белгісіз нәрсе мен медициналық препарат салынған йогуртты тергеу абақтысына өткізбек болған әрекеттің жолы кесілді. Сәлемдеме сараптамаға жіберілді, - деді Рахманов.
Фархат ӘБІЛОВ
Атырау облысы бойынша Қылмыстық-атқару жүйесі департаменті жолдаған сурет