Облыстық денсаулық сақтау басқармасы: «Екі айлық дәрі-дәрмек қоры бар, бірақ ол Ақтөбеде»

«АЖ» өткен аптада Атырауда сыбайлас жемқорлыққа қарсы қызмет «СК-Фармация» қоймасын тексеру кезінде ол жерде уәде етілген екі айлық дәрі-дәрмек қоры жоқ болып шыққанын хабарлаған еді. Осыдан кейін облыстық денсаулық сақтау басқармасы мен «СК-Фармация» брифинг ұйымдастырды.

Облыстық денсаулық сақтау басқармасының бастығы Асхан БАЙДУӘЛИЕВТІҢ айтуынша, биыл Атырау облысына 4 миллиард теңгенің дәрі-дәрмегі жеткізілген, бұл өткен жылмен салыстырғанда екі есе көп. Мұның негізгі бөлігі жаз айларында пандемия өршіп тұрған кезде келген.

Байдуалиев жазда облыста дәрі-дәрмектер мен медициналық жабдықтар жетіспегенін, коронавирусты емдеу хаттамалары жиі өзгеріп тұрғанын айтты.

- Қазір жағдайды бақылауда ұстап отырмыз. Облыста оттегі станциялары, жаңа ауруханалар салынуда, жедел жәрдем автопаркі көліктермен толықты. Аудандарға тағы 12 УАЗ көлігін күтіп отырмыз, - деді облыстық денсаулық сақтау басқармасының басшысы.

Бүгінде бес препаратпен емдеудің негізгі хаттамасы бекітілген - 3 антикоагулянт, ыстық түсіретін және вирусқа қарсы препараттар. Алайда клиникалық белгілеріне, жасына, салмағына, иммунитетіне және науқас ағзасының басқа ерекшеліктеріне байланысты ем тағайындалады.

Дәрі-дәрмек қорына келер болсақ, Байдуәлиевтің айтуынша, «СК-Фармация» дистрибьюторының Ақтөбедегі аймақтық хабында Атырау облысына арналған 90 мыңнан астам препараттар сақталады. Бұл бөлшек саудамен айналысатын дәріханаларға арналған 2-3 айлық қор, бұл 13000 адамға жетуі тиіс.

Бұдан басқа, тамыз айынан кейін жеткізілген барлық дәрі-дәрмектердің 97%-ы облыстағы медициналық мекемелерде сақталып тұр. Демеушілік көмегімен 251 млн теңгеге дәрі-дәрмектер сатып алынды, олар Геологтағы емхана қоймасында тұр. Егер эпидемиологиялық жағдай нашарласа, бұл дәрі-дәрмектер медициналық мекемелерге беріледі. Бұдан басқа, «Атырау» ӘКК-де 500 миллион теңге көлемінде дәрі-дәрмектерді тұрақтандыру қоры құрылды.

«СК-Фармация» өкілі Қажымұқан БАЛМАҒАМБЕТОВ бүгінде Атырау емханалары мен емдеу мекемелерінің 1-2 айға жететін қормен қамтамасыз етілгенін растады.

- Ақтөбеде коронавирусты емдеу үшін екі айға жететін дәрі-дәрмек қоры сақталып тұр. Қажет болған жағдайда дәрі-дәрмектер Атырауға 12 сағат ішінде жеткізіледі, - деп сендірді ол.

Ал өткен аптада Ақтөбе облысына ҚР Сыбайлас жемқорлыққа қарсы іс-қимыл агенттігінің серіктестік департаментінің директоры Расул МЕДЕТОВ келіп, «СК-Фармация» қоймаларының қорларына күмән келтірді. Атап айтқанда, тексеру кезінде «СК-Фармация» өкілдері аймақтық хабта дәрі-дәрмектердің бар-жоғы мен саны туралы нақты ақпарат бере алмады.

Көріп отырғаныңыздай, тексерушілердің сөзі мен медиктердің жауабы әртүрлі, бұл коронавирустың ықтимал екінші толқынына билік органдарының үйлестіру нашарлығы мен дайын еместігін көрсетеді.

Нұргүл ХАЙРУЛЛИНА