Жазалары күшейтілді

Атырау облысы бойынша Қылмыстық-атқару жүйесі департаменті қарасты Пробация қызметі полициямен бірлесіп, «Учаске» профилактикалық іс-шарасын өткізуде. Олар шартты сотталғандарға тексеру жүргізіп жатыр.

- Қоғамнан оқшаулаумен байланысты емес жазаға сотталғандардың тұрғылықты мекен-жайы бойынша тексеріп, мінез-құлқын, тұрмыс-тіршілігін бақылап, олармен тәрбиелік мәні бар профилактикалық сұхбат жүргізіп жатыр, - дейді Атырау облысы бойынша ҚАЖД Пробация қызметіне басшылық жасау бөлімшесінің бастығы Нұрлан ҚАБДОЛОВ.

Атырау облысы бойынша ҚАЖД баспасөз-қызметінің хабарлауынша, қазіргі таңда пробация қызметінің есебінде тұрған 499 сотталғанның мекен-жайына тексеріс жүргізілген. Сондай-ақ, арнайы құқықтық база арқылы сотталғандардың пробация қызметін хабардар етпей мекен-жайын ауыстыру, әкімшілік жауапкершілікке тартылу, шетелге шығу секілді істерді жасаған-жасамағандығын анықтау жұмыстары жүргізілуде.

- Аталған тексеріс барысында 39 сотталғанның сот жүктеген міндеттерден жалтарғандығы анықталып, ескерту жарияланды. Ал 8 сотталғанға қатысты бас бостандығын шектеу жазасын бас бостандығынан айыруға ауыстыру туралы сотқа ұсыным жолданды, - дейді Қабдолов.

«Учаске» республикалық профилактикалық іс-шарасы желтоқсан айына дейін жалғасады.