Атырау әкімі бүкіл жол салу жұмысын видеоға түсіруге нұсқау берді

24 қыркүйекте қала әкімдігінде жол құрылысының сапасы бойынша кеңес өтті. Біраз уақыттан бері жол жұмысшыларының жұмыс сапасына жынысөзекті бұрғылау әдісі арқылы бақылау жасалатын - тексеру үшін бұрғыланған саңылаудан төселген асфальт үлгісі алынады.

Осылайша 6 мамырда Құрманғазы көшесіндегі жол төсемінің қалыңдығын көрсеткен жынысөзек алынды: оң жағында - 26 см, ось бойынша - 26,5 см, сол жағында - 23 см. Жоба бойынша қалыңдық 30 см болуы керек, оның ішінде қара қиыршық тас төсемі - 15 см, ірі түйіршікті асфальт - 15 см және ұсақ түйіршікті асфальт - 5 см. Бұдан басқа, осы жынысөзекті зерттеу жаңа төсем тазартылмаған ескі төсемнің үстіне салынғанын көрсетті. Жалпы, жұмыс ҚР ГОСТ 1225-2019 стандартына сәйкес келмейді деген қорытынды жасалды.

29 мамырда Бейбарыс даңғылынан жынысөзек алынды. Бұл жерде орнықсыз, сусымалы қиыршық тас өлшем жүргізуге еш мүмкіндік бермеді.

- Бұл асфальтбетонды төсеу кезінде тығыздау мен температуралық режим сақталмағанын көрсетеді, - дейді «Ұлттық жол активтері сапасы орталығы» РМК Атырау облысы бойынша филиалы басшысы Бекбол МҰҚАШЕВ.

28 тамызда Ғабдиев көшесінен алынған жынысөзек тексеріліп жатыр.

- Қалалық ТКШ бөлімі бізбен 25,8 миллион теңге сомада келісімшарт жасады, бірақ көп ұзамай қаржыландыру тоқтатылды. Бізге жұмысты тоқтату туралы нұсқау келді, - деді Мұқашев.

Қала әкімі Қайрат ОРАЗБАЕВ қаржыландыру мәселесін шешуге көмектесуге уәде берді.

Ал ТКШ бөлімінің басшысы Эдуард ОСПАНОВ жиналғандарды биыл жол қызметінде ешқандай заң бұзушылық болған жоқ деп сендірді.

Қала әкімі көбіне жұмыс жүріп жатқан жерге бармайтын техникалық және авторлық қадағалау қызметтерін сынға алып, жол қызметкерлеріне жол салудың барлық процесін видеоға түсіруді тапсырды.

Мұрат СҰЛТАНҒАЛИЕВ