Атырауда коронавирус инфекциясын жұқтырып, ауырғандар үшін дене шынықтыру-сауықтыру кешендерінің жанынан 6 оңалту орталығын ашу жоспарланып отыр. Облыстық денсаулық сақтау басқармасының баспасөз қызметінің хабарлауынша, онда физиотерапия, массаж және тыныс алу гимнастикасы қызметі көрсетіледі. Әр орталық белгілі бір медициналық мекемеге бекітілген.
- Тұрғындар жергілікті емхана дәрігерлерінің жолдамалары арқылы орталықтың қызметіне ақысыз негізде жүгіне алады. Оңалту орталығында реабилитолог, психолог мамандар, медбике мен спорт нұсқаушысы қызмет етеді. Нұсқаушы дәрігермен келісілген жаттығуларды тағайындайды, - деді облыстық денсаулық сақтау басқармасының басшысы Нұрлыбек ҚАБДЫҚАПАРОВ.
- Қауіпті инфекциялық аурудан сауығу үшін ағзаға біраз уақыт керек. Атап айтқанда, науқас тыныс алу жаттығуларын жасайды, басқа оңалту шараларын жүргізеді. Ағза оңалуы үшін 7-14 күн ем алу керек, - дейді №3 Атырау қалалық емханасының бас дәрігері Айман ӨТЕГЕНОВА.
Қазіргі кезде дене-шынықтыру спорт залдарына ем-домға қажетті жабдықтар жеткізілуде.
Атырау қаласы бойынша емханамен бірлескен оңалту шаралары өтетін дене шынықтыру-сауықтыру кешендерінің тізімі:
«Атырау» ДСК: №3, №7 қалалық емханалар;
«Ривьера» ДСК: №1, №5 қалалық емханалар;
«Мұнайшы» стадионы: №2 қалалық емхана;
«Томарлы» стадионы: Атырау қалалық Геолог емханасы, «Сәлімжан и К» ЖШС емханасы;
«Судоремонтник» стадионы: №4 қалалық емхана; Дамбы, Еркінқала дәрігерлік амбулаториялары;
«Нұрсая» ДСК: «Ақтөбе Транзит Экспедейшн» клиникасы.
Дайындаған Айнұр САПАРОВА