Атыраудың дәріханаларында дәрі-дәрмектің шекті бағасы көрсетілген хабарлама іліп қойған.
Атырау облысының сыбайлас жемқорлыққа қарсы қызметі өмірлік маңызы бар дәрі-дәрмектердің бағасын реттеуді қолға алды. Плакаттарда ең қажетті парацетамол, ацетилсалицил қышқылы, ингавирин, антигриппин және аспирин кардио дәрілері белгіленген. Әрқайсысының жанында шекті бағасы мен өндірушісі көрсетілген. Сондай-ақ денсаулық сақтау министрі бекіткен дәрі-дәрмектердің жаңартылған толық тізбесіне сілтеме жасайтын QR-код бар. Дәріханаға келгенде белгілі бір препараттың шекті бағасын білу үшін QR-кодқа телефонды жақындатсаңыз жеткілікті, - дейді Сыбайлас жемқорлыққа қарсы іс-қимыл Департаментінің баспасөз хатшысы Айдана АМАНИЯЗОВА. Ол үшін алдымен телефонға QR сканерін жүктеп алу керек.
Дәрі-дәрмек пен медициналық бұйымдардың шекті бөлшек сауда бағасы көрсетілген ақпараттық материалдар өңірдің барлық дәріханасына таратылады.
Зульфия ИСКАЛИЕВА
Сыбайлас жемқорлыққа қарсы қызмет ұсынған сурет