Атырауда сертификатталмаған дәрі-дәрмек сатылған

ҚР ҚМ Қаржы мониторингі комитетінің Атырау облысы бойынша экономикалық тергеу департаментінің қызметкерлері жедел-іздестіру шараларын жүргізу барысында дәрі-дәрмектерді жоғары бағада және арнайы рұқсатсыз сатқанын анықтады. Атырау тұрғынынан 244 мың теңгенің препараттары тәркіленді.

Одан ҚР фармацевтикалық бақылауымен сертификатталмаған ресейлік дәрі-дәрмек өнімдері, атап айтқанда, «Плавикс», «Азитрамицин», «Ингавирин 90», «Парацетамол», «Тавиник», «Тромбо АСС», «Кардиомагнил» дәрілері тәркіленіп алынды.

- Азаматшаның іс-әрекетінде ҚР ӘҚБтК-нің 426-бабында (Фармацевтикалық қызметтің және дәрілік заттар мен медициналық бұйымдардың айналысы саласының қағидаларын бұзу) көзделген әкімшілік құқық бұзушылық белгілері бар, - деп хабарлады ҚР ҚМ Қаржылық қадағалау комитетінің баспасөз қызметі.

Бұл факт бойынша материалдар Атырау облысы бойынша ТҚСҚБД жіберіліп, тәркіленген дәрі-дәрмектер Атырау облысы бойынша Денсаулық сақтау басқармасына берілді. 

Фархат ӘБІЛОВ