В Атырау 0 
26 шілдеде Қызылқоға ауданы Жасқайрат ауылына қарасты Дәулетиман елді мекенінің тұсындағы далалықтан ірі қара малдың жайрап жатқан ішек-қарындары табылды. Жергілікті тұрғындардың бірі түсірген бейнежазба әлеуметтік желіде тарап, біршама пікірталас тудырды.
Белгісіз ұрылар 5 ірі қараны ұрлап, сойып етін алып, ішкі құрылысын қылмыс жасаған жерде лақтырып кеткен. Қылмыскерлерді қазір полиция іздестіруде.
Қызылқоға ауданы әкімінің орынбасары Марат ӘБУОВ:
- Осындай қылмыс Батыс Қазақстан облысының Қаратөбе ауданында да орын алып отыр – ол бізден алыс емес. Полиция жұмыс жасап жатыр. Негізі тұрғындар малдарын қараусыз қалдырмай, бақташы шығаруы қажет қой.
Аудандық ІІБ бастығы Нұркен НҰҒМАНОВ осы оқиғаға байланысты ҚР ҚК 188-1 бабы 2 бөлігі («Ірі мөлшерде жасалған мал ұрлау») бойынша іс көтерілгенін қосымша хабарлады. 188-1 бабы Қылмыстық кодекске жақында енгізілді, оған сәйкес, егер қылмыскерлер ұсталса, 3 жылдан 7 жылға дейін бас бостандығынан айырылып, мүлкі тәркіленеді. Былтыр Қызылқоға ауданында 13, ал биыл 7 мал ұрлығы фактісі тіркелген. Полиция барлық қылмыстың ашылып жатқанын тілге тиек етті.
Ләззат ҚАРАЖАНОВА
Сурет әлеуметтік желіден алынды