Атыраулықтар карантин режимін бұзуды тоқтатпай отыр

Атырау облысының әкімдігі полиция және СЭС қызметкерлерімен бірлесіп карантин режимінің сақталуына қатысты рейд өткізіп тұрады. Осындай рейдтердің бірінде «астыртын» өтіп жатқан үйлену тойын анықтады. Сондай-ақ, түнде жұмыс жасаған дүкендер мен көлік жөндеу орындары анықталды.

Мәселен, 12 шілдеге қараған түні Жұмыскер ауылында көлік жөндеу орталығы жұмыс істеп тұрған, ал Привокзальный ықшам ауданында сағат 12:30-да азық-түлік дүкені ашық болған.

- Екі жағдай бойынша тәртіп бұзушыларға тиісті құжаттар толтырылды, - деп әңгімелейді Атырау қалалық полиция басқармасы взводының командирі Жасұлан КАМАРЕДЕНОВ. – Рейд кезінде алты көлік иесіне ескерту берілді.

Ал демалыс күндері режим бұзғандар көбейді. Сенбі мен жексенбіде карантин режимін бұзған 175 дерек анықталды, оның 81-і – Атырау қаласында тіркеліп отыр.

- Атырау облысының бас санитариялық дәрігерінің қаулысына қарамастан мейрамханалар мен кафелер келушілерді ғимарат ішінде тамақтандыруды жалғастырған. Алайда оларға «үйге жеткізу» қағидасы бойынша жұмыс жасауға рұқсат етілген. Осындай жағдай тоғыз  жерде анықталды, - деп хабарлайды облыстық әкімдіктің баспасөз қызметі.

Рейд барысында  24 азық-түлік дүкенінің жұмыс уақытынан тыс мезгілде саудамен айналысқаны белгілі болды. Эпидемиологиялық ахуалдың асқынғанына қарамастан, топтаcып жүрудің 26 дерегі, отбасылық шара өткізудің бір дерегі тіркелді.

- Карантиндік талаптарды сақтамау Жылыой ауданында да кездесіп отыр. Ол жерде той, садақа түрінде бес отбасылық шара анықталды, - деп хабарлайды баспасөз қызметі. – Демалыс күндері қозғалысқа толықтай тыйым салынғанына қарамастан, көшеде себепсіз жүрудің 30 дерегі тіркелді. Азық-түлік дүкендерінің жұмыс уақытынан тыс мезгілде сауда жасауы бойынша Индер ауданында 4, Құрманғазы ауданында 3 дерек анықталып отыр.

Нәтижесінде демалыс күндері карантиндік шектеу талаптарын бұзудың Атырау қаласында 81, Жылыой ауданында 37, Индер ауданында 4, Исатай ауданында 14, Қызылқоға ауданында 7, Құрманғазы ауданында 23, Махамбет ауданында 9 дерегі анықталып отыр.

Фархат ӘБІЛОВ