NCOC-та бір адамнан басқа вирус жұқтырғандар жоқ

NCOC-тің аутсорсинг нысандарының бірінде жұмыс істейтін компания қызметкерінен COVID-19 расталғаннан кейін, «АЖ» консорциумның баспасөз қызметіне қосымша сұрақтар жолдады.

Жауапқа сүйенсек, компания 8 маусымнан бастап NCOC қызметкерлерінің кеңсеге оралу жоспарын әзірлеген.

«Бұл жоспар бойынша, белгілі бір уақыт кезеңінде кеңсеге кіре алатын қызметкерлер саны шектеулі болады. Мәселен, бүгінде кеңселерге орналасу рұқсат етілген алаңның 25% деңгейінде жүзеге асырылады, ол бір адамға шаққанда 10 шаршы метр стандартты лимит негізінде есептелген. Бұл кезеңнің ұзақтығы ахуалдың даму динамикасына байланысты», - деп хабарлайды баспасөз қызметі.

Каспий теңізіндегі D аралына келер болсақ, вахта ауысымы жоспар бойынша 7 күндік карантин сақталып, ПТР сынаманың теріс шығуына сәйкес жүзеге асады. Қазіргі уақытта аралда 300-ден астам адам бар.

Компания қызметкерлерінің арасында басқа вирус жұқтырған жағдай тіркелген жоқ.

Нұргүл ХАЙРУЛЛИНА