Балабақшалардағы орындарды бөлу кейінге қалды

Әдетте 1 маусымнан басталатын балабақшалардағы орындарды бөлу биыл карантинге байланысты кейінге қалдырылуы мүмкін.

Бұл туралы телефон арқылы Атырау қалалық білім беру бөлімінің мектепке дейінгі бөлімінің бас маманы Айжан ЕСМАҒАМБЕТОВА хабарлады. Қазіргі уақытта балабақшалар жұмыс істемейді. Оларды қазір ашуға болмайды.

- Біздің өңірімізде коронавирус инфекциясына шалдығудың апта сайынғы өсу қарқыны 7%-дан асады. Дәлірек айтсақ, 10% құрайды. Осыған байланысты, бүгінде жергілікті биліктің балабақшаларды ашуға мүмкіндігі жоқ, - деп атап өтті жақында онлайн-брифингте Атырау қаласы әкімінің орынбасары Ұлықбек ТНАЛИЕВ.

А.Есмағамбетованың айтуынша, балаларды мектепке дейінгі мекемелерге қабылдау бойынша электронды мемлекеттік қызметтерді ұсынатын indigo.atyrau.e-orda.kz сайты жұмыс істеп тұр.

Алайда, жолдаманы алғаннан кейін бала 5 күн ішінде медициналық комиссиядан өтуі тиіс, әйтпесе жолдама «күйіп кетеді». Қазіргі уақытта емханалар әлі қалыпты жұмыс істемейді, сондықтан барлық мамандардан тез өтіп шығу қиынға соғады. Осылайша, балабақшалардағы орындар емханалардың толыққанды жұмысымен тікелей байланысты бөлінеді.

- Балабақшалардағы оқу жылы 30 мамырда аяқталады. Емханалар әдеттегідей жұмыс істей бастағанда, біз орындарды бөлуді бастаймыз, - деді А.Есмағамбетова.

Зульфия ИСКАЛИЕВА