Мал іздеймін деп, өзі жоғалды

26 сәуірде Жылыой ауданы Құлсары қаласының 40 жастағы тұрғыны жоғалған малын іздеп шығып, үйіне оралмады. Үш күннен кейін, 29 сәуірде туыстары ТЖД-ға хабарласты.

Сол күні оны жылыойлық құтқарушылар тауып алды. Оның «Нива» көлігі қаладан 120 шақырым жерде, Каспий теңізінің жағалауында балшыққа батып қалған екен.

- Ер адам аман-сау, зардап шекпеген, медициналық көмекке зәру емес еді. Құтқарушылардың күшімен кешке қарай көлік қалаға жеткізілді, - деп хабарлады төтенше жағдайлар департаментінің баспасөз қызметі. Құтқару жұмысына 5 қызметкер және жол талғамайтын 1 «Трэкол» көлігі жұмылдырылды.

Фархат ӘБІЛОВ