В Атырау
+4 
1 наурызда кеште Жайық-Атырау бекіре балығын өсіру зауытының қызметкерлері Жайық өзенінен салмағы 148 келі, ұзындығы 2,2 метр болатын уылдырықты қортпа мен 4 бекіре аталығын ұстады.
- Мұздың ерте кетуіне байланысты ау тартуды 23 ақпанда бастап кеттік. Күні кешеге дейін ауға ешбір балық түспеді, енді міне, қараңыз, қандай балықтың түскенін! Шамасы балық енді көріне бастаған сияқты, - дейді балық өсіру зауытының директоры Ғилыман СӘРСЕМӘЛИЕВ.
- Сіз бұл олжаны өзен сағасында қытайдың “CNCEC” компаниясы жүргізіп жатқан тереңдету жұмыстарымен байланыстыра аласыз ба?
- Бұл тереңдету жұмыстары балық шаруашылығы үшін өте тиімді және көктемгі балық аулау маусымына жақсы әсерін тигізеді. Біз уылдырықты бекірелерді аулау бойынша жоспарды орындаймыз деген үміттеміз.
- 2018 жылдың желтоқсанында зауытта аналық үйірлер қырылып қалған болатын. Қазір қалпына келтіру жұмыстары қалай жүріп жатыр?
- Біз бұл жұмысты өткен жылы жүргізіп, ішінара қалпына келтірдік. Бұл қортпа өз уылдырығын шашқан соң, аналық үйірге қосылады.
- Ал егер уылдырықты балық ауға түспесе, қолда бар балықтармен будандастырып, теңізге жіберу үшін шабақтарды өсіріп шығара аласыздар ма?
- Біз мемлекеттік тапсырыс аясында будандастырылған бекіре тұқымдас балықтардың шабақтарын өсіріп, теңізге жіберуге қақымыз жоқ. Бірақ бұл қызметпен тауарлық бекіре шаруашылығы бағдарламасы аясында айналысуға болады.
Мұрат СҰЛТАНҒАЛИЕВ