Атырауда алып жүкке жол ашпақ болған электр маманын тоқ соқты

Бүгін, 28 қарашада, Атырау қаласы шетіндегі Бірлік ауылының тұсында «АтырауНефтеМаш» ЖШС өндірістік базасынан ірі көлемдегі жүкті тасымалдау кезінде электр маманы жарақат алды: жүктің жүру жолындағы жоғары вольтты желіні ажырату кезінде қатты тоқ соқты.

- 3-4-дәрежелі электр күйігін алған ер адам облыстық ауруханаға түсті. Жағдайы ауыр, қазір жансақтау бөлімінде жатыр, - деп хабарлады Денсаулық сақтау басқармасының баспасөз қызметі.

Естеріңізге салсақ кеше, 27 қарашада, Қарабатанда салынып жатқан газ-химия кешеніне газды бөлуге арналған үлкен көлемді сплиттер-колоннаны тасымалдау басталған еді. Жабдық «АтырауНефтеМаш» ЖШС зауытында жасалған.

Облыс әкімдігінің баспасөз қызметі хабарлағандай, төрт күн ішінде (қалада екі күн) ол күндізгі уақытта сағатына 3 км жылдамдықпен тасымалданады. «Алыпты» жеткізу кезінде оң жағалаудағы аркаларды, бағдаршамдарды, көптеген жол белгілерін бұзу керек болды, сол себепті кеше бірнеше сағатқа электр қуаты ажыратылған еді.

Фархат ӘБІЛОВ