Әлсіз болса да үміт бар

25 қазанда Қызылордада жергілікті «Қайсар» мен «Атырау» командалары арасында футболдан ел чемпионатының 31-турының матчы өтті. Күтпеген жерден бұл кездесу қонақтардың жеңісімен аяқталды.

39-минутта «Атыраудың» поляк шабуылшысы Петр ГЖЕЛЬЧАК гол соқты. Қалған уақыттың барлығында қонақтар осы кішкентай жеңіс есебін жанқиярлықпен қорғап шықты.

Бұл жеңіс мұнайлы астана клубының Премьер-лигадағы орнын сақтап қалуға үміт беруі (өте көп емес) мүмкін. Көрейік. Енді «Атырауда» 23 ұпай бар, 10-орын үшін таласатын қарсыласы «Таразда» - 25 ұпай. Бірақ «Тараз» 27 қазанда «Жетісумен» өткізетін 31-турдағы матчын ойнаған жоқ. Бірақ «Атырау» командасының да «Шахтермен» кездесу ойыны бар (30 қазанда). Ол Кубоктың финалы үшін өткізілмей қалған еді.

Содан кейін командалар чемпионаттың шешуші соңғы екі турын ойнайды: 2 қарашада «Атырау» өз алаңында «Ордабасымен» және 9 қарашада Алматыда «Қайратпен» ойнайтынын еске саламыз. Ал «Қайратқа» чемпион болу үшін ұпайлар өте қажет. Сол уақытта «Тараз» өз алаңында «Қайсармен» және сырт алаңда «Ордабасымен» ойнайды.

Мұрат СҰЛТАНҒАЛИЕВ