Қарасораны ормасаң, айыппұл арқалайсың

Атырау қаласының маңындағы демалыс бзаларының бірінде Атырау облыстық Полиция департаментінің есірткі бизнесімен күрес басқармасының қызметкерлері жабайы қарасора қопасын тауып алды.

Полиция департаментінде бұдан бұрын Махамбет ауданында, сондай-ақ, қала маңындағы Ақжар ауылында орналасқан үш демалыс орнының иелеріне қатысты ұйғарым шығарылғанын, соған сәйкес, олар жабайы қарасораны жоюға міндетті болғанын хабарлады. Алайда ешқандай шара қолданылмаған.

- Атырауда маусым айында басталған және күзге дейін жалғасатын «Көкнар» жедел-алдын алу іс-шарасы өтуде. Осы іс-шара барысында полиция қызметкерлері жабайы қарасора қопасын тапты, - деп хабарлады ПД баспасөз қызметі.

Демалыс орындарының қожайындары ҚР Әкімшілік құқық бұзушылық туралы кодекстің 420-бабы (Жабайы сораны жоюға шара қолданбау) бойынша әкімшілік жауапкершілікке тартылды. Олар 40-тан 70 АЕК-ке дейін айыппұл төлеп, 10 күн ішінде қарасораны шабуға міндетті.

Фархат ӘБІЛОВ

Суретті Атырау облыстық ПД ұсынды