Дина базарында әйелді ұрған ер адам ұсталды

Әлеуметтік желілерде «Дина» базарының бақылау камераларына түсіп қалған бейнежазба таралып жатыр. Онда ер адам сатып алушының бірінің жанынан өтіп бара жатып, асқан ептілікпен оның бетінен жұдырықпен ұрып жіберіп, әрі қарай адымдап кете барады.

Атырау облыстық Полиция департаментіндегілер күдіктінің ұсталғанын, әзірге ҚР ҚК-нің 293-бабы (Бұзақылық) бойынша сотқа дейінгі тергеу жұмыстары басталғанын хабарлады. Бірақ сот-медициналық сараптама қорытындысы бойынша 106, 107 және 108-баптарға (Денсаулыққа қасақана ауыр, орташа, жеңіл зиян келтiру) ауысуы мүмкін екен.

- 1986 жылы туған күдікті ұсталды. Ол 2010 жылдан бері облыстық психоневрологиялық диспансерде есепте тұр, ал қазіргі кезде «эмоционалды тұрақсыз жеке басының бұзылуы» диагнозымен облыстық психикалық денсаулық орталығына жатқызылды. Жәбірленушінің денсаулығына келтірілген зиян ауырлығын анықтау үшін сот-медициналық сараптама тағайындалды. Прокуратура тергеу барысын бақылауға алды, - деп хабарлады Атырау облысының прокуратурасы.

«АЖ» АНЫҚТАМАСЫ
Эмоционалды тұрақсыз жеке басының бұзылуы (ескі атауы – қозғыш типтің жеке басының бұзылуы) - эмоционалды қызбалықпен, албырттықпен, өзін-өзі басқарудың төмендігімен сипатталатын жеке басының бұзылуы.

Фархат ӘБІЛОВ

Әлеуметтік желілерден алынған бейнежазба