Жайықты зерттеуге конкурс жарияланды

Мемлекеттік сатып алу сайтында «Жайық өзеніндегі тіршілік ортасының жай-күйі және оның ихтиофаунаға әсерін бағалау бойынша кешенді зерттеулер жүргізу» конкурсы жарияланған. Тапсырыс беруші - Атырау облысының балық шаруашылығы басқармасы, құны - 71 млн теңге.

Құжаттарда зерттеулер Бугорки тартымынан бастап ағыспен төмен қарай сағалық алқапқа дейін, сондай-ақ Перетаска тармағы мен Курилкин су қоймасында жүргізілуі керек екені көрсетілген.

Ғалымдар су қоймаларының гидроэкологиялық жай-күйіне, ихтиофаунаның және азықтық ағзалардың тіршілік ортасының токсикологиялық жай-күйіне, балық организміндегі патологиялық өзгерістерге және т.б. талдау жүргізуге міндетті.

«АЖ» балық шаруашылығы басқармасының басшысы Артур САДЫБЕКҰЛЫНА бірнеше сұрақ қойған еді.

- ІІМ тергеу тобының балықтың қырылуын тергеу жұмыстарының қорытындысы қандай?

- Әзірге қорытынды бізге түскен жоқ. Күтіп отырмыз.

- Неліктен ихтиофаунаны зерттеу жұмыстары 71 млн теңгеге бағаланған? Жыл басында 80 млн туралы айтылып еді.

- 80 миллионнан ҚҚС алып тастағанда 71 млн қалады.

- Ғалымдар өз жұмыстарының нәтижелерін қашан жариялайды?

- Есептерді қабылдауды екі кезеңге бөлдік. 15 тамызға дейін тікелей зерттеу нәтижелері, ал 15 желтоқсанға дейін ұсынымдар қабылданады.

- Конкурсқа, мысалы, Астрахан мамандары қатыса ала ма?

- Иә, қазақстандық және шетелдік ғалымдар да қатыса алады.

- Қалған нәрсені зерттеуге кеш емес пе?

- Бұл жоба Жайықтағы балықтың қырылуына қатысты жауаптарды алуды ғана мақсат етпейді. Бұл кешенді жұмыс. Біз қалыптасқан ахуалға және ихтиофаунаға төнетін қауіптерге уақытылы баға беруіміз керек.

Мұрат СҰЛТАНҒАЛИЕВ