Иран: Мұнай экспорттаушы елдер ұйымы таратылуы мүмкін

Иран мұнай ісі жөніндегі министрлігі мәлімдеме жасап, Иранның Мұнай экспорттаушы елдер ұйымына өз мүддесі үшін мүше екенін, егер ұйым мүшелері Иран мүддесіне қарсы әрекеттерге барса Теһран қатаң жауап қайтаратынын ескертті. 

Бұл туралы сол елдің IRNA ақпараттық агенттігі хабарлады. Иран мұнай министрі Бижан Намдар Зангена аталған мәлімдемесін бейсенбі күні елдің орталық қаласында МЭЕҰ бас хатшысы Мұхаммед Сануси Баркиндомен кездесу кезінде жасаған. 

Ол сөзінде: «МЭЕҰ кейбір мүшелерінің біржақты әрекеттерінен зардап шегіп отыр. Бұлай жалғаса берсе Мұнай экспорттаушы елдер ұйымы тарап кетуі мүмкін. МЭЕҰ мүшелері Иранға қысым жасап, оның мүдделерін қатерге итермелесе, бұл Теһран тарабынан жауапсыз қалмайды», – деген. 

Аталған ұйымның бас хатшысы Иран сапарында бірқатар ресми кездесулер өткізген. Ол қазіргі жағдайда Иран мұнайын әлемдік нарықтан алып тастаудың мүмкін емес екенін де ескерткен. Иранның мұнай экспорттаушы елдердің қауымдастығымен жасап отырған кейбір қадамдары АҚШ-тың соңғы санкция шешімдеріне байланысты екені анық. 

Дереккөз: “The Qazaq Times”