Медициналық сақтандыру қорына 32 млрд теңге жиналды

Өткен жылдың желтоқсан айында міндетті медициналық сақтандыру қорына 7,4 млрд теңге аударылды, деп хабарлайды Baq.kz ақпарат агенттігі Медициналық сақтандыру әлеуметтік қорының баспасөз қызметіне сілтеме жасап.

2017 жылдың 1 шілдесінен бастап қордағы жұмыс берушілер мен жеке кәсіпкерлер аударымы мен төлем мөлшері 32,1 млрд теңгені құрады.

«Аталған соманың 26,4 млрд теңгесі (82,2%) азаматтық-құқықтық сипаттағы келісім-шарттар негізінде жұмыс істейтін жұмыс берушілер, 5,7 млрд теңгесі (17,8%) жекеменшік кәсіпкерлер тарапынан келіп түсті», - делінген баспасөз хабарламасында.

Аймақ бойынша ең көп сома Алматы, Астана, Қарағанды және Шығыс Қазақстан облыстарынан келіп түсті.

Дереккөз: baq.kz