В Атырау 0 
Вашингтондағы Бүкіләлемдік банктің мәжіліс залына пайымы терең, парасаты биік қазақ қызы Алма Оразалинованың есімі берілді.
Білімді де білікті, ойы ұшқыр отандасымыз халықаралық қаржы орталығында өзінің іскерлігімен ерекше көзге түскен екен. Өмірден ерте өтсе де, даналығымен дараланған жерлесіміздің есімі Америка, Ұлыбритания, Үндістан, Сингапур, Жапонияда елдеріне етене танымал.
Вашингтондағы Бүкіләлемдік банктің штаб пәтеріне кіру оңай емес. Стратегиялық маңызды нысан бұқаралық ақпарат құралдарының өкілдері үшін жабық. Міне тап осы орында қазақ қызының есімі ерекше дәріптеледі. «Не үшін?» дейсіз ғой. Себебі қандасымыз банктің дамуына зор үлес қосқан. Халықаралық қаржы орталығына сіңірген еңбегі ерен. Мұны бәрі мойындайды.
Джейн Клемент, Бүкіләлемдік банктің қызметкері:
– Алмамен таныс болғанымызға 20 жылдан асты. Кезінде түрлі жобаларды бірлесе атқардық. Тек әріптес емес, жақсы дос болдық. Оның іскерлігіне тәнтімін. Жұмысқа өте тиянақты, әр міндетін мінсіз атқаратын.
Алма Оразалинова Мәскеу мемлекеттік университетінде, Массачусетс технологиялық институтында білім алған. Сондықтан банк басшылығы оған аса маңызды жобаларды сеніп тапсырып, іскерлік қабілетін жоғары бағалады. Нәтижесінде отандасымыз жүктелген кез келген тапсырманы тап-тұйнақтай орындап, ұжымында зор абырой-беделге ие болды. Алайда бейнетінің зейнетін көру маңдайына жазбапты. Ауыр дертке шалдыққан Алма бұдан екі жыл бұрын көз жұмды.
Джейн Клемент, Бүкіләлемдік банктің қызметкері:
– Алманың орны ойсырап тұр. Оның ерен еңбегі ескеріліп, мәжіліс залына есімі берілді. Ол Бүкіләлемдік банкте синдикация және Исламдық қаржыландыру процесі бойынша қажырлы қызмет етті.
Олимпия Аджино, Бүкіләлемдік банктің қызметкері:
– Алмамен 12 жыл әріптес болдым. Банк тарихында оның алатын орны орасан. Іскер, білімді әрі достыққа адал жан еді. Алма Оразалинова өмірінің соңғы күндеріне дейін адал қызметкер екенін дәлелдеп өтті. Әріптестерімен үнемі тығыз байланыста болып, күрделі есеп-қисаптарды шебер шешіп отырды.
Зауре Швейд, Бүкіләлемдік банктің ресурстарды басқару жөнінде маманы:
– Оның орнын ешкім алмастыра алмайды. Сандарға, есепке жүйрік еді. Операция жасалып, ауыр халде ауруханада жатса да, математикалық формулаларды сұрап алдыртатын. Есепті шешкенде дертімнен жеңілдеп қаламын дейтін.
Джейн Клемент, Бүкіләлемдік банктің қызметкері:
– Алманың ерекшелігі өте қарапайым болатын. Адамгершілігі зор, жүзінен әркез мейірім төгіліп тұратын. Банкте ол кедейшілікпен күрес бағытында еңбек етті.
Қамшының сабындай қысқа ғұмырында даналықпен дараланған қазақ қызы дамушы елдер үшін маңызды жобаларды жүзеге асыра білді. Оның игі бастамалары әлі күнге дейін жалғасын тауып келеді. Елге мейірім шуағын төккен Алманың атындағы аудиторияда енді кедей-кепшіктерге көмек көрсетуді көздеген маңызды шешімдер қабылданып жүр.
Дереккөз: 24.kz