Атырау, 29 наурыз 04:43
 ашықВ Атырау +4
$ 448.15
€ 483.46
₽ 4.86

Әлия Назарбаева жаңа қауымдастықты басқарады

2 121 просмотра

Фото: Sputnik

Бүгін ОКҚ-де Қазақстанның экологиялық ұйымдары қауымдастығы таныстырылды, деп хабарлайды Sputnik Қазақстан тілшісі. 

Қауымдастық президиумына "Қоғамдық маңызды бастамаларды дамыту қорын" басқаратын Әлия Назарбаева жетекшілік етеді. Қор экология мәселесімен де айналысады. Қауымдастықтың қамқоршылық кеңесіне "жасыл экономика" бойынша Нобель сыйлығының лауреаты, жасылдану концепциясының авторы Рае Квон Чунг енді. 

Таныстырылым барысында қауымдастық президиумының мүшесі Салтанат Рахимбекова Әлия Назарбаеваның құттықтау сөзін оқып берді. 

"Қазақстанның экологиялық ұйымдары қауымдастығы жүйелі экологиялық бастамаларды құру және ілгерілету, "жасыл" экономиканы насихаттау алаңына айналып, ұлттың экологиялық этикасы мен мәдениетінің қалыптасуына, экологиялық білім мен тәрбиеге ерекше мән береді. Өзіндік реттеу қағидаттары негізінде экология проблемалары бойынша мемлекеттік органдармен етене байланыс орнату өте маңызды. Бізді қоғамда экологиялық мәдениет қалыптастыру бойынша үлкен жұмыс күтіп тұр. Біз бірлесіп қана айтарлықтай маңызды нәтижелерге қол жеткізе аламыз. Осы сәтті пайдаланып, қызығушылық танытқандардың барлығына есігіміз ашық екенін айтқым келеді. Барлық экологиялық ұйымды күш-жігерімізді біріктіруге шақырамын", — делінген құттықтау хатта. 

Экологиялық ұйымдар қауымдастығы өз алдына экологиялық бастамалар және оларды ілгерілету алаңын құру; халықаралық серіктестікті дамыту, инвестиция тарту, халықаралық жобалар мен бағдарламаларға қатысу, халықаралық сарапшыларды шақыру; "жасыл" технологияны енгізу, қалалардағы экологиялық инфрақұрылымдардың дамуы мен  инновациялардың алға басуына үлес қосу; ҚР экологиялық мәселелер бойынша заңнаманы жетілдіру міндеттерін қойып отыр.

Дереккөз: Sputnik

29 қараша 2017, 11:14

Қате таптыңыз ба? Тінтуірмен белгілеп, Ctrl + Enter түймесін басыңыз.

Осы мақала тақырыбына қатысты ой-пікіріңізбен бөлісіп, бейнежазба жолдағыңыз келсе, WhatsApp +7 771 37 800 38 нөміріне және editor@azh.kz поштасына жібере аласыз.