В Атырау -2 
Қазақстан Ұлттық банкі бүгіннен бастап Delta Bank-тің жаңа депозитке ақша қабылдау және банк есепшоттарын ашу лицензиясын 1 қарашаға дейін тоқтатты. Ұлттық банк лицензияны коммерциялық банк банк заңнамаларын бұзғандықтан және ішкі қадағалау жүйесін жақсарту қажеттігінен тоқтатқанын айтады.
Delta Bank-тің лицензиясы бірінші рет тоқтатылып тұрған жоқ. Ұлттық банк Delta Bank-тің лицензиясын 21 маусымнан 3 тамызға дейін тоқтатқан. 22 мамырда Ұлттық банк Delta Bank-тің 2017 жылдың 15 маусымына дейін жеке және заңды тұлғалардан депозит қабылдап, банкте есепшоттар ашуына тыйым салған. Ұлттық банк ол кезде мұны Delta Bank-тің төлем жасау және қаржы аудару операцияларына қатысты келісім міндеттемелерін сәйкесінше орындамағаны және пруденциялық нормативтерді бұзғаны үшін "қадағалау әрекеті аясында" қабылдағанын айтқан.
Өткен жылы 1 қарашада Ұлттық банк Delta Bank-тің депозит қабылдау және жеке азаматтарға банк есепшотын ашу лицензиясын тоқтатып, желтоқсанның соңында қайта күшіне енгізген еді.
Ұлттық банктің ақпаратына қарағанда, 2017 жылдың 1 шілдесіне дейін Delta Bank-тің жеке тұлғалардан қабылдаған депозит көлемі 250 миллион теңге, заңды тұлғалардан қабылдаған депозиті 85,6 миллиард теңгені құрайды. Банк жүйесіндегі депозиттердің жалпы көлеміндегі Delta Bank депозиттерінің үлесі 0,5 пайызға тең.
Дереккөз: Азаттық