В Атырау +21.7 
Ананың ащы айқайына қарамастан ұстап әкету әрекеті Атырауда үлкен реніш тудырды. «Ақ Жайық» құқық қорғаушылардың 31 жастағы ер адамды жауап алуға не себепті шақыртып, соңына түскен қылмыстық істің мән-жайын анықтады.
Бәрі атыраулық азаматтың бір әйелмен арадағы келіспеушілігінен басталған. Содан кейін ол екі жолдасымен бірге пневматикалық қару алып, есеп айырысуға аттанады. Әңгіме жараспай, екі жақ мәмілеге келе алмаған соң, ер адамдардың бірі қарсыласына пневматикалық тапаншадан үш рет оқ атады. Алайда өзара келіспеушілік осымен аяқталмайды. Арты төбелеске ұласып, суық қару да қолданылған.
Кейіннен сот екі серіктесті де нақты бас бостандығынан айыру жазасына кесті, ал бұл азаматтың өзі осы іс бойынша куәгер ретінде қатысқан болатын.
Дереккөзіміздің хабарлауынша, екі сотталушы шартты түрде жаза аламыз деп үміттенген, бірақ жарияланған үкім оларды есеңгіретіп жібергені соншалық, бұрын жасырып келген жайттарды жайып салған.
Олардың айтуынша, бүкіл қақтығыстың бастамашысы дәл осы куәгер болып шықты. Дереккөздің айтуынша, бұл азаматтың бұрын ұрлық үшін соттылығы болғандықтан және жаңа қылмыстық іс бойынша оған нақты мерзім берілуі мүмкін болғандықтан, серіктестері басында оның рөлі туралы тіс жармаған. Алайда өздері сотталғаннан кейін бұл жайтты жасырып қалуды жөн көрмеген.
Сотталушыларды тыңдаған соң, сот олардың серігінің әрекеттеріне құқықтық баға беру қажеттілігі туралы жеке қаулы шығарды. Осылайша куәгер бұзақылық бабы бойынша бөлек қылмыстық өндірістің фигурантына айналып, қыркүйекте күдікті мәртебесін алды.
Бірақ оны тергеушіге жауап алуға алдырту оңайға соқпаған. Полиция өкілдерінің айтуынша, ол тергеушінің шақыртуларын елеусіз қалдырған. Ал өзі, блогерлер мен журналистерге хабарласып, құқық қорғаушылардың қысым көрсетіп жатқанына және полицияға күштеп апармақ болғанына шағымданған.
6 қазанда ол Самал ықшамауданында полиция әрекетіне наразылық білдіріп, көпқабатты үйдің екінші қабатындағы кондиционердің сыртқы блогына шығып алған. Келіссөздерден кейін оны түсіріп, қолхатпен босатты.
Бірақ 13 қазанда бұл оқиға тағы да жалғасын тапты. Бұл жолы ер адам тікенек сымы бар металл шарбаққа шығып алды. Оны ұстау әрекеті бұрынғысынан әлдеқайда қатаң болды және видеоға түсіп қалды. Әсіресе полициядан ұлын босатуды өтініп, айқайлаған ананың үні халықтың көңілін елжіретіп жіберді.
Бұл жолы ол қолхатпен құтыла алмады. Оны ҚР ҚПК-нің 128-бабында қарастырылған тәртіппен ұстап, уақытша ұстау изоляторына қамады.
Атырау облысының полиция департаменті «АЖ» тілшісіне екі жағдайда да сөз бір адам туралы болып отырғанын растады. Ведомство заңсыз қудалау туралы айыптауларды жоққа шығарып, өз әрекеттерін күдіктінің тергеуден бой тасалауына байланысты деп түсіндірді.
Анастасия ШЕРСТЯНКИНА