В Атырау +21.3 
2100 жылға қарай Орталық Азия халқының саны екі есеге жуық өсіп, 75 миллионнан 149,9 миллион адамға жетеді. Бұл ретте өңір тұрғындарының жартысына жуығын Өзбекстан азаматтары құрайды. Мұндай деректер БҰҰ-ның Халық саны бөлімінің жаңартылған базалық болжамында келтірілген, деп жазадыenergyprom.kz.
Қазақстанды не күтіп тұр?
Сарапшылардың есептеуінше, Қазақстан халқының саны да тұрақты өседі. Алайда бұл өсім қарқыны өңірдегі көрші мемлекеттерге қарағанда баяуырақ болады.
2100 жылға қарай Қазақстан халқының саны 33,7 миллион адамға жетеді деп болжанып отыр.
2020 жылғы көрсеткішпен салыстырғанда халық санының өсімі 75,3%-ды құрайды.
Салыстыру үшін айтар болсақ, ғасыр соңына қарай Қырғызстан халқы 11,7 миллионға (+72,4%), Түрікменстан халқы 8,4 миллионға (+53,2%) жетеді. Ал Тәжікстан халқы екі есеге өсіп, 20,2 миллион адамды құрайды.
Өзбекстан — өңірдегі демографиялық өсімнің негізгі қозғаушы күші
Орталық Азия халқының негізгі өсімі Өзбекстанның есебінен болады. Егер 2020 жылы Өзбекстан тұрғындарының өңір халқының жалпы санындағы үлесі 43,9% болса, 2100 жылға қарай бұл көрсеткіш 49,6%-ға жетеді. Яғни ел халқы 2020 жылғы 33 миллионнан 74,4 миллион адамға дейін өседі.
Сарапшылар демографиялық өсімнің ең жоғары қарқыны алдағы онжылдықтарда, атап айтқанда, 2030–2040 жылдарға дейін байқалады деп болжайды. Одан кейін халықтың біртіндеп қартаюы мен туу коэффициентінің төмендеуіне байланысты өсім баяулай бастайды.
Қандай қиындықтар мен тәуекелдер бар?
БҰҰ сарапшыларының айтуынша, ұзақ мерзімді демографиялық болжамдар үкіметтерге экономика, білім беру, денсаулық сақтау және көлік инфрақұрылымын жоспарлау үшін қажет.
Өңір халқының екі есеге жуық өсуі жаңа нарықтық мүмкіндіктермен қатар бірқатар күрделі міндеттерді де туындатады.
Инфрақұрылымға түсетін жүктеме. Өзбекстанда халықтың тығыздығы 2024 жылғы бір шаршы шақырымға шаққанда 85,5 адамнан 2100 жылға қарай 174,8 адамға дейін өседі деп күтілуде. Бұл ірі қалалар мен өңірдің су ресурстарына түсетін жүктемені едәуір арттырады.
Өмір сүру ұзақтығының артуы. 2100 жылға қарай Өзбекстанда орташа өмір сүру ұзақтығы 83 жасқа жетеді деп болжануда. Әйелдердің өмір сүру ұзақтығы 85 жас, ал ерлердікі 81 жас болады.
Жас құрылымының өзгеруі. Өңір тұрғындарының орташа жасы ұлғаяды. Мысалы, Өзбекстанда бұл көрсеткіш 2030 жылғы 26,5 жастан 2100 жылға қарай 39 жасқа дейін өседі. Жастар үлесінің азаюы туу деңгейінің табиғи түрде төмендеуіне және зейнетақы жүйесіне түсетін жүктеменің біртіндеп артуына әкелуі мүмкін.