В Атырау +21.3 
Қазақстанда бензин бағасының өсуі азық-түлік пен бірінші кезекте қажетті тауарлардың айтарлықтай қымбаттауына әкелмеуі тиіс. Бұл туралы Сауда және интеграция министрі Арман Шаққалиев мәлімдеді.
Журналистер министрдің назарын соңғы екі-үш аптада елде жанармай бағасы литріне орта есеппен 20 теңгеге қымбаттағанына аударды.
Жағдайға түсініктеме берген Арман Шаққалиев тауарларды өндіру мен жеткізуге жұмсалатын жалпы шығындар құрылымында бензиннің үлесі небәрі 2–3%-ды құрайтынын түсіндірді. Оның айтуынша, билік бағаның өсуіне байланысты ықтимал тәуекелдерді ішкі нарықты қажетті тауарлармен қамтамасыз ету және тұрақты ауыл шаруашылығы жәрмеңкелерін өткізу арқылы азайтуды көздеп отыр.
«Бүгінде қабылданып жатқан шаралардың арқасында бұл фактордың әсері бәсеңдеп жатқанын көріп отырмыз. Нарық қажетті тауарлармен толықтырылып, жәрмеңкелер өткізіліп жатыр», — деп атап өтті министр.
Отандық нарықты қолдаудың тағы бір тетігі ретінде сауда желілеріне қойылатын жаңа талаптар енгізіледі. 20 қазаннан бастап сауда орындарының сөрелерінде Made in Kazakhstan таңбасы бар өнімдердің міндетті түрде ұсынылуына қатысты нормативтер күшіне енеді.
Сауда және интеграция министрлігі бұл шаралар кешені бағаны тұрақтандыруға және отандық тауарлардың халық үшін қолжетімді болуын қамтамасыз етуге көмектеседі деп үміттенеді.