В Атырау +21.5 
Атырау облысының 15 емханасы мен алғашқы медициналық-санитариялық көмек ұйымдарында жасанды интеллектке негізделген “Akylmed AI” бірыңғай медициналық коммуникациялар жүйесі енгізілді.
Жаңа жүйе №6 қалалық емханада 37 мыңнан астам пациентті қамтып үлгерді. Облыс әкімі Болат Ақшолақов цифрлық платформаның жұмысымен танысып, оның тиімділігін атап өтті.
Жүйенің “Әсел” атты виртуалды операторы тәулік бойы қызмет көрсетеді. Ол “Damumed” ақпараттық жүйесімен біріктіріліп, дәрігерге жазылуды жеңілдетіп, анықтамалық сұрақтарға жауап береді. Сонымен қатар тұрғындарды скринингке, вакцинацияға және флюорографияға шақырады, сақтандырылмаған азаматтарға МӘМС бойынша ақпарат береді, шағымдарды қабылдап, олардың қаралуын бақылайды.
№6 емханада ЖИ негізіндегі өзіне-өзі қызмет көрсету терминалы орнатылған. Бұл құрылғы арқылы тұрғындар тіркеу бөліміне бармай-ақ ақпарат алып, кейбір мәселелерді өздері шеше алады. Денсаулық сақтау басқармасы жүйеге қосылған барлық ұйым бойынша жиынтық талдауды көре алады, ал кейін деректерді ситуациялық орталыққа қосу жоспарланып отыр.
Атырау облысы — ЖИ негізіндегі бірыңғай медициналық коммуникация жүйесін орталықтандырылған форматта енгізген елдегі алғашқы өңір.
Жоба Президент Қасым-Жомарт Тоқаевтың денсаулық сақтау саласына жасанды интеллектті жаппай енгізу тапсырмасы аясында жүзеге асырылды.
Келесі кезеңде пациенттерге арналған мобильді қосымша әзірленіп, дәрігер қабылдауына жазылу және алдын ала шағымдар мен белгілерді енгізу мүмкіндігі қарастырылмақ.
Ақшолақовтың айтуынша, цифрлық шешімдер нақты нәтиже беріп, дәрігерлердің жұмысын жеңілдетіп, қызметті халыққа қолайлы етуі тиіс.
