В Атырау +17.8 
BI Group Атыраудағы дендропарк құрылысы жобасының параметрлеріне қатысты түсініктеме берді және мемлекеттік-жекеменшік әріптестік аясында жеке серіктес ретінде әрекет ететін «Atyrau Green Park» ЖШС-нің рөлін түсіндірді.
Компанияның мәліметінше, «Atyrau Green Park» шынында да BI Group құрамына кіреді, оның құрылтайшысы – General Contractors Group Ltd., ол да BI Group-қа тиесілі. Келісімшарт бойынша тарап ретінде тікелей «Atyrau Green Park» ЖШС көрсетілген. 29,6 млрд теңге дендропаркті салу құны емес…
BI Group түсіндіргендей, «Atyrau Green Park» ЖШС дендропарк жобасын жүзеге асыру үшін арнайы құрылған. Бұл компанияға қаржыландыру, жобалау, құрылыс және кейінгі пайдалану міндеттері жүктелген.
Компания бөлек атап өткендей, «Atyrau Green Park» ЖШС-де бар болғаны бес қызметкер жұмыс істейді.
BI Group-тың айтуынша, қазіргі штат негізінен жобаны басқару, келісімшарт және қаржыландыру функцияларын атқарады. Ал жобалау, құрылыс және пайдалану жұмыстары үшін мердігер ұйымдар тартылмақ. Жоба кезең-кезеңімен іске асқан сайын компанияның өз штаты да кеңеюі тиіс.
29,6 млрд теңгенің құрылымы
BI Group атап өткендей, 29,6 млрд теңге дендропаркті салу құны емес және «Atyrau Green Park» ЖШС-ге төленген қаржы да емес.
Бұл көрсеткіш 2033 жылға дейінгі мемлекеттік міндеттемелердің жиынтық көлемін білдіреді. Оның құрамына үш бөлік кіреді: объектіні құруға арналған мемлекетпен бірлесіп қаржыландыру, жеке әріптестің инвестициялық шығындарын өтеу және парк пайдалануға берілгеннен кейінгі күтіп-ұстау мен пайдалану шығындарына байланысты қолжетімділік үшін төлем.
BI Group-тың мәліметінше, бүгінгі күнге дейін «Atyrau Green Park» ЖШС де, топтағы басқа компаниялар да жоба бойынша қаржы алған жоқ.
Инвестициялық шығындарды өтеу және қолжетімділік үшін төлем тек нысан пайдалануға берілгеннен кейін қарастырылған. Бұл төлемнің көлемі келісімшарттағы талаптарға сәйкес объектіні күтіп-ұстау жағдайына байланысты болады.
Компания сондай-ақ мемлекеттік міндеттемелердің жалпы көлемі келісімшартпен бекітілгенін және құрылыс қымбаттаған жағдайда ұлғаймайтынын атап өтті. Бұл тәуекелді жеке әріптес көтереді.
Неге конкурсқа тек бір компания қатысты
BI Group «Atyrau Green Park» ЖШС-нің шағын штатымен конкурсқа қатысуына да түсініктеме берді.
Компания мемлекеттік-жекеменшік әріптестік туралы заңнамаға сүйене отырып, арнайы құрылған жобалық компанияның біліктілік бағалауында оның қатысушыларының ресурстары ескерілетінін атап өтті. «Atyrau Green Park» ЖШС жағдайында мұндай қатысушы – General Contractors Group Ltd.
Конкурс екі кезеңде өткізілгенімен, нәтижесінде тек бір өтінім түсті. BI Group қолданыстағы ережелерге сәйкес, егер жалғыз өтінім белгіленген талаптарға сай болса, оны қарастыруға және қабылдауға мүмкіндік бар екенін баса айтты.
Компанияның мәліметінше, «Atyrau Green Park» ЖШС-нің өтінімі біліктілік тексерісінен өтті, конкурс комиссиясында қаралды және келісімшарт шарттары бойынша келіссөздер жүргізілді.
Дендропаркті кім салады
Қазіргі уақытта нақты мердігерлер анықталған жоқ. Мемлекет алдында жобалау, құрылыс және кейінгі пайдалану бойынша жауапкершілік «Atyrau Green Park» ЖШС-ге жүктелген. Ал мердігер ұйымдар жоба жүзеге асқан сайын кезең-кезеңімен тартылатын болады.
BI Group мәлімдегендей, әзірге дендропарк құрылысының «Alem Qurylys» ЖШС-мен байланысын негіздеуге себеп жоқ. Бұл компания мемлекеттік-жекеменшік әріптестік келісімінің тарапы емес және қазіргі таңда жобаға мердігер ретінде бекітілмеген.
Осылайша, BI Group-тың ұстанымы мынадай: «бес қызметкері бар компания 29,6 млрд теңге алды» деген тұжырым жобаның заңдық және қаржылық құрылымын көрсетпейді. Компанияның дерегіне сәйкес, 29,6 млрд теңге – бұл 2033 жылға дейінгі ұзақ мерзімді келісімшарт бойынша мемлекет мойнына алған міндеттемелердің жиынтық көлемі. Ол құрылыс құны да емес, әрі қазірдің өзінде төленген қаржы да емес.