В Атырау +24.6 
Каспий құбыр консорциумының акционерлері Стамбулда 29–30 қыркүйекте өткен отырыста компанияның қазіргі қызметін және оны дамыту келешегін талқылады.
КҚК бас директоры Николай Горбаньның хабарлауынша, 2026 жылдың 1 қаңтары мен 25 қыркүйегі аралығында Теңіз терминалы арқылы 50 млн тоннаға жуық мұнай жөнелтілді. Бұл өткен жылдың ұқсас кезеңімен салыстырғанда шамамен 4 млн тоннаға аз.
Осы кезеңде терминал 397 танкерді өткізді, ал бір жыл бұрын олардың саны 453 болған еді.
КҚК жөнелту көлемінің төмендеуіне әсер еткен бірнеше факторды атады. Олардың қатарында — 2025 жылы сыртқы айлақ құрылғысында болған оқиғаның салдары, 2026 жылдың бірінші тоқсанында «Теңізшевройл» ЖШС тарапынан мұнай тапсыру көлемінің азаюы, Новороссийск ауданындағы қауіп сигналы ұзақтығының артуы, сондай-ақ ауа райы қолайсыз болған күндердің жиілегені бар.
Отырыста акционерлерге КҚК-ның 2027–2036 жылдарға арналған Даму стратегиясын дайындау барысы да таныстырылды.
Қатысушылар құбыр жүйесінің жай-күйін, Сенімділік жөніндегі үйлестіру комитетінің жұмыс нәтижелерін, ұзақ мерзімді инвестициялық жобалардың іске асырылуын және мұнай айдау режимдерін оңтайландыру бойынша ұсыныстарды талқылады.
Компания шығындарын оңтайландыруға ерекше назар аударылды.
КҚК мәліметінше, 2026 жылдың алғашқы сегіз айында компания мен мердігер ұйымдардың қызметкерлері оқыс оқиғасыз 8,2 млн адам-сағат жұмыс істеді, ал автокөліктің апатсыз жүрісі 42 млн шақырымға жетті.
Компанияда еңбекті қорғау, өнеркәсіптік және экологиялық қауіпсіздік саласындағы көшбасшылық бағдарламасы да одан әрі дамытылуда. Жылдың бірінші жартысында КҚК-ның барлық бөлімшелерінде көшбасшы-тәлімгерлер қауымдастығы құрылды.
Отырыс қорытындысы бойынша «КҚК-Р» АҚ және «КҚК-К» АҚ Директорлар кеңесінің мүшелері сайланды.