В Атырау +24.6 
Атырау облысында «емші» атанған әйелге қатысты сот үкімі шықты. Ол адамдарды аурудан айықтырудың орнына олардың ақшасы мен мүлкін «жоғалту» схемасын жолға қойған.
Схема №1: Subaru Outback және «салықтық дұғалар»
Алғашқы жәбірленуші – ұлын жоғалтқан әйел. Марқұм Грузиядан Subaru Outback көлігін әкелген еді. «Емші» отбасына сенімге кіріп, көлікті заңдастыруға көмектесемін деп уәде берген. 2025 жылдың қарашасынан 2026 жылдың қаңтарына дейін анасы түрлі Kaspi-карталарға ақша аударды:
2,6 млн теңге – көлікті «рәсімеуге»,
790 мың теңге – «салық қарызын өтеуге»,
450 мың теңге – «шекарадағы мәселені шешуге». Барлығы – 3 848 681 теңге. Көлік заңдастырылмады.
Схема №2: Жылжымайтын мүлікке элиталық төсек жабдығы
Келесі жәбірленушіге үй сатып алуға көмектесемін деген. «Аванс» ретінде үш қымбат төсек жабдығын талап еткен (570 мың теңге). Тауарды Атыраудан Құлсарыға таксимен жіберген. Осылайша «көмек» аяқталған.
Үкім және финал
Жалпы шығын – 4 418 681 теңге. Ақшаны қайтарудан бас тартқан. Сот әйелді алаяқтық үшін кінәлі деп танып, бастапқыда 4 жыл 8 айға бас бостандығынан айыруға үкім шығарды. Амнистия қолданылып, мерзім 3 жыл 6 айға қысқарды. Бірақ ол түрмеге отырмады:
Әйелдің тоғыз кішкентай баласы бар екені анықталды.
Жазаны өтеу екі жылға кейінге қалдырылды.
Сот залынан босатылды.
Сонымен бірге жәбірленушілерге 4,4 млн теңгені толық өтеу міндеті сақталды. Енді сот орындаушыларының бұл соманы көпбалалы «емшіден» өндіріп алуына қанша уақыт кететіні белгісіз.