В Атырау +31.9 
«Respublica» партиясы фракциясының депутаттары Атырау — Астрахань бағытын қоса алғанда, жүктемесі жоғары төрт трансшекаралық бағытты бірінші техникалық санатқа ауыстыруды қарастыруды ұсынды.
Тиісті сауал Премьер-министр Олжас Бектеновке жолданды.
Бірінші техникалық санат қарсы бағыттағы қозғалысты бөле отырып, кемінде төрт қозғалыс жолағын — әр бағытта кемінде екі жолақтан қарастырады. Жолақтардың нақты саны қозғалыс қарқыны мен жолдың есептік өткізу қабілетін ескере отырып белгіленеді.
Депутаттық сауалда келтірілген мәліметтерге сәйкес, республикалық автожолдардың жалпы ұзындығы шамамен 25 мың шақырымды құрайды. Оның ішінде 4 мың шақырымға жуығы бірінші санатқа жатады. Бұл ретте жекелеген бағыттарда қозғалыс қарқыны жыл сайын 15–20%-ға артып отыр.
Депутаттар қарастыру үшін мына маршруттарды басым деп атады:
- Атырау — Астрахань;
- Ақтөбе — Орал — «Сырым» өткізу пункті — Ресей шекарасы;
- Талдықорған — Өскемен — Шемонаиха — Ресей шекарасы;
- Павлодар — Семей — Қалбатау — Зайсан — Майқапшағай — Қытай шекарасы.
Сауал авторлары жоғары жүктеменің мысалы ретінде Талдықорған — Өскемен — Шемонаиха — Ресей шекарасы бағытын келтірді. Олардың мәліметінше, бұл жолмен күн сайын 10 мыңға дейін, ал курорттық кезеңде 15 мыңға дейін автомобиль өтеді.
2025 жылы бұл бағытта 246 жол-көлік оқиғасы тіркеліп, онда 46 адам қаза тапты және 473 адам зардап шекті. Сауалға сәйкес, дәл осы кезеңде республикалық жолдарда жалпы алғанда 994 адам қаза тапқан.
Депутаттар сондай-ақ жолдар мен шекаралық инфрақұрылымды үйлесімді дамыту қажеттілігіне де назар аударды. Олардың пікірінше, егер кіреберіс жолдар халықаралық бағыттардың өткізу қабілетін шектейтін болса, өткізу пункттерін жаңғырту күткен нәтижені бермейді.
Бөлек ұсыныс Жаңа Бейнеу — Сексеуіл жобасына қатысты. Құжатта көрсетілгендей, жолды екінші техникалық санат параметрлері бойынша салу жоспарланып отыр, ал инвестиция көлемі шамамен 800 млрд теңгеге бағаланды. Маршрут Қытай шекарасын Ақтау және Құрық порттарымен байланыстырып, әрі қарай Еуропаға шығуды қамтамасыз етуі тиіс.
Сауал авторлары бұл жолдың құрылысын қазірдің өзінде бірінші санат параметрлері бойынша қарастыруды ұсынады. Олардың пайымдауынша, бұл кейіннен кеңейту мен қайта жаңартуға кететін қосымша шығындардың алдын алуға мүмкіндік береді.
Үкіметке трансшекаралық автожолдардың санатын, қозғалыс қарқындылығын, жүк ағынын, апаттылығын және транзиттік әлеуетін ескере отырып, оларға түгендеу жүргізу ұсынылды. Оның нәтижесі бойынша депутаттар жаңғыртуға арналған басым дәліздерді айқындауды және жол жобаларын өткізу пункттерін жаңартумен үйлестіруді сұрайды.
Сауалға берілетін жауапта Үкіметтен бірінші санатқа ауыстыру жоспарланған жолдардың тізбесін, олардың ұзындығын, іске асыру мерзімдері мен қаржыландыру көлемін көрсету сұралды.
22 қыркүйекте «ҚазАвтоЖол» басқарма төрағасы Дархан Иманашев Үкімет отырысында Атырау — Доссор жолын бірінші техникалық санатқа ауыстыру жоспарланып отырғанын хабарлады.