В Атырау +29.4 
19 қыркүйекте Атырау облысындағы Silleno полиэтилен зауытының құрылыс алаңында жобадағы ең биік колонна орнатылды. Жабдық қазақстандық «АтырауНефтеМаш» кәсіпорнында жасалған.
Этиленді фракциялау колоннасының биіктігі 101,8 метр, диаметрі — 7,5 метр. Толық жиынтықта оның салмағы 1,8 мың тоннадан асады. Колонна полиэтилен өндірісінің негізгі шикізаты – этиленді бөліп алуға арналған.
Монтаждау жұмыстары бес сағатқа жуық уақытты алды. Көтеру үшін максималды жүк көтергіштігі 4 мың тонна болатын шынжыр табанды кран және 1,7 мың тонналық қосымша кран пайдаланылды. Алдымен жабдық көлденең күйде сәл көтеріліп, кейін тік күйге ауыстырылды, іргетасқа орнатылып, бекітілді.
Осы негізгі кранды салмағы 700 тоннаға жуық шынықтыру колоннасын монтаждау үшін де пайдалану жоспарлануда. Оның биіктігі 50 метрден асады, диаметрі 10 метрге жуық болады. Бұл жабдық та «АтырауНефтеМаш» зауытында дайындалуда.
Компания мәліметінше, жобаны жүзеге асырудың жалпы жұмысының ілгерілеу жоспарланған 30% көрсеткіштің орнына 38,5%-ға жетті. Құрылыс алаңында 5 мыңға жуық адам мен 500-ден астам арнайы техника жұмылдырылған. Ғимараттар құрылысы, инженерлік желілерді жүргізу және жабдықтарды монтаждау жұмыстары жалғасып жатыр.
Болашақ зауыттың жобалық қуаты жылына 1,25 млн тонна полиэтиленді құрайды.