В Атырау +29.4 
Жамбыл облысында болған атышулы жол-көлік оқиғасынан зардап шеккен 36 жастағы Нұржігіттің туыстары оның денсаулығы аз да болса жақсарғанын хабарлады. Ер адамның отбасымен түсірілген видеоны Instagram-да Мәжілістің бұрынғы депутаты Бақытжан Базарбек жариялады.
Зардап шеккен азаматтың туысының айтуынша, Нұржігіт емін жалғастырып жатыр, ал Базарбек отбасының қасында болып, қажетті көмек көрсетіп отыр.
«Қазір ағамның жағдайы қанағаттанарлық. Оған көмектесіп жатқан медицина қызметкерлеріне шексіз алғыс білдіреміз. Баршаңыздан оның сауығып кетуі үшін тілеулес болуды сұраймыз», — деді ол.
Базарбек емдеу шаралары Жамбыл облыстық денсаулық сақтау басқармасының қолдауымен жүргізіліп жатқанын хабарлады. Оның сөзінше, жұмысқа реаниматологтар, травматологтар және басқа да мамандар тартылған, ал Денсаулық сақтау министрлігі консилиумдар өткізуге қатысуда.
«Динамикада аздаған оң өзгерістер бар. Расталмаған қауесетті таратуды қояйық. Бәріміз де Нұржігіттің аяққа тұрып, отбасына аман-есен оралуын тілеп жатырмыз», — деді бұрынғы депутат.
Сондай-ақ ол ер адамның жағдайы тұрақталғаннан кейін ары қарайғы тексерілуі мен емін, соның ішінде Астана мен Алматының нейрохирургиялық орталықтарында ұйымдастыруға көмектесуге уәде берді.
Жол апаты 15 тамыз кешке Тұрар Рысқұлов ауданындағы «Батыс Еуропа — Батыс Қытай» трассасында болған. Полицияның алдын ала болжамы бойынша, Toyota жүргізушісі жолдың жүру бөлігінде болған ер адамды қағып кеткен. Апат дерегі бойынша сотқа дейінгі тергеп-тексеру басталды.
Базарбек бұл жол апатына қатысы барын растады, алайда тергеу мәліметтерін жарияламау туралы қолхат бергенін алға тартып, егжей-тегжейлі ақпарат беруден бас тартты. Апаттың мән-жайы мен оған қатысушылардың жауапкершілік дәрежесі анықталып жатыр.