В Атырау +27.6 
Атырау облысының әкімі Болат Ақшолақов Қызылқоға ауданындағы әлеуметтік маңызы бар нысандарды аралап, олардың құрылыс және жөндеу жұмыстарының барысын тексерді.
Әкім алдымен Жамансор мен Мұқырдағы теміржол вокзалдарына барды. 1976 жылы салынған екі ғимарат бүгінде қайта жаңғыртылуда. Жамансор вокзалының дайындығы – 50%, Мұқыр вокзалы – 35%. Ақшолақов мердігерлерге жұмысшылар мен техниканы көбейтіп, реконструкцияны 1 қыркүйекке дейін аяқтауды тапсырды.
Жамансордағы 80 орындық жаңа мектеп пен интернаттың құрылысы аяқталған. Әкім лицензиялау процесін жеделдетіп, жаңа оқу жылына дейін мектепті ашуды міндеттеді. Мұқырдағы 400 орындық Мәдениет үйінің дайындығы – 80%, ал аудан орталығындағы 500 орындық мәдениет үйі – 30%. Әкім қыс түскенше бетон жұмыстарын аяқтап, төбесін жабуды тапсырды.
Сонымен қатар, Индер–Қарабау–Миялы–Сағыз автожолындағы жөндеу жұмыстарының барысы тексерілді. Миялыдағы Ы.Шөреков атындағы мектеп-гимназия күрделі жөндеуден өтуде. Жангелдин ауылында салынып жатқан дене шынықтыру-сауықтыру кешені мен 300 орындық мәдениет үйінің құрылысын аяқтау үшін қаржыландыру мәселесі шешілуі тиіс.
Ойыл өзенін тазарту, түбін тереңдету және арнасын кеңейту жобасы да назарға алынды. Бұл бастама елді мекендерді су басу қаупін азайтуға бағытталған.
Әкім барлық нысандарды тұрақты бақылауда ұстап, мерзімдерді сақтауды және сапаны қамтамасыз етуді тапсырды. Ол ауылдық жерлердің инфрақұрылымын дамыту халықтың өмір сапасын жақсартатынын, білім алу, спортпен айналысу, мәдени демалыс пен жайлы тұрмыс үшін заманауи жағдай жасалуы керегін атап өтті.