В Атырау +35.7 
Президент Қасым-Жомарт Тоқаев өмір жолы өскелең ұрпаққа үлгі-өнеге болатын, ұлт мүддесі үшін қажырлы қызмет етіп, халықтың ықыласына бөленіп келе жатқан бір топ азаматқа құрмет көрсетті. Салтанатты шара Ақорда төрінде өтті.
Мемлекет басшысы марапат иелерінің әрқайсысының елге сіңірген еңбегін жеке атап өтті:
«Отан» орденін иеленген Бәтима Зәуірбекова — отандық гобелен өнері мектебінің негізін қалаған тұңғыш кәсіби маман. Президент оның ұлттық мәдениетті, салт-дәстүрді дәріптеудегі және бейнелеу өнеріндегі дара қолтаңбасын жоғары бағалады.
I дәрежелі «Барыс» орденімен марапатталған Тұрсын Жұртбай — көрнекті әдебиеттанушы ғалым. Мемлекет басшысы оның Абай мен Мұхтар Әуезовтің мұрасын терең зерттеп, төл тарихтың ақтаңдақ тұстарын жаңғыртуға қосқан үлесін атап өтті.
II дәрежелі «Барыс» ордені ұсынылған Александр Судьин — мемлекет қайраткері. Тәуелсіздіктің алғашқы жылдарынан бастап мемлекеттік қызметте, Парламент Сенатының вице-спикері және аппарат басшысы ретінде қазақстандық парламентаризмді дамытуға елеулі үлес қосты.
«Қазақстанның халық әртісі» атағы берілген Нұрқанат Жақыпбай — театр және кино режиссері. Жарты ғасырдан астам уақыт ішінде мазмұнды қойылымдар сахналап, жас таланттарды тәрбиелеуде зор еңбек сіңіргені үшін марапатталды.
«Қазақстанның еңбек сіңірген қайраткері» атағына ие болған Виктор Хильниченко — агроөнеркәсіп саласының ардагері, «Хильниченко және К» серіктестігінің басшысы. Президент оның Алматы облысының аграрлық әлеуетін арттырудағы жемісті жұмысын ерекше атап өтті.
Сөз соңында Қасым-Жомарт Тоқаев елімізде жүріп жатқан түбегейлі өзгерістерге тоқталып, жаңа Конституцияның қабылдануы мен алда өтетін Құрылтай сайлауының маңыздылығын тілге тиек етті. Мемлекет басшысы елдің өсіп-өркендеуі мен тұрақтылығының негізі жалпыұлттық бірлік пен ынтымақта екенін баса айтты