В Атырау +33.2 
Қазақстандық танымал тревел-блогер Дастан Мұхамедрахим (bydastann) Құрманғазы ауданындағы лотос алқаптарын көрсетті. Дронмен түсірілген бейнежазба әлеуметтік желі қолданушыларының назарын бірден аударды.
Кадрларда қалың лотос арасынан салынған ағаш жолақ анық көрінеді.
Жазбаға блогер: «Біздің елде осындай әдемі жер бар екенін білдіңіз бе? Құрманғазы ауданында сирек кездесетін лотос алқаптарын көруге болады» деп жазды.
Дастан табиғат пен Қазақстанның көрікті орындары туралы атмосфералық бейнелер түсіруімен танымал.
Оның Instagram парақшасына шамамен 2 миллион адам жазылған. 2026 жылы ол халықаралық WIBA Awards сыйлығында Best Travel Blogger аталымының лауреаты атанды.
Лотос алқаптары Қиғаш өзені бойында орналасқан. Белсенді гүлдеу кезеңі әдетте шілде мен тамыздың алғашқы жартысына сәйкес келеді.
Өткен жылы бұл туристік бағытты бір айда шамамен 40 мың адам тамашалаған. Қонақтарға қайықпен серуендеу, балық аулау және құстарды бақылау мүмкіндігі ұсынылады.
15–16 тамызда Құрманғазы ауданының Теңіз ауылында LOTUS FEST фестивалі өтеді.
Бағдарламада концерттер, көрмелер, ұлттық ойындар, мәдени-ойын-сауық шаралары және қазақстандық орындаушылар қатысатын гала-концерт бар.
Фестивальден кейін де гүлдеу маусымы аяқталғанға дейін лотос алқаптарын көруге болады.