В Атырау +22.6 
Қазақстан 2026 жылдың алғашқы жеті айында мұнай өндіруді шамамен 9 пайызға азайтты. Сарапшылардың бағалауынша, мұнай-газ секторындағы көрсеткіштердің төмендеуінен экономиканың жалпы шығыны 3,5 миллиард доллардан асып кетті, деп жазады «Байдильдинов. Нефть» телеграм-арнасы.
ҚР Ұлттық экономика министрлігінің мәліметінше, 2026 жылдың қаңтар–шілде айларында елде 53,2 миллион тонна мұнай өндірілді, бұл өткен жылдың сәйкес кезеңімен салыстырғанда 8,9 пайызға аз.
Энергетика министрлігінің басшысы Ерлан Ақкенженов түсіндіргендей, тек бірінші жартыжылдықта 3,3 миллион тоннаға артта қалып келеміз. Ведомство көрсеткіштердің төмендеуінің басты себептері ретінде «КҚК мен Теңіздегі жағдайды» атады. Бұл ретте Энергетика министрлігінің 2026 жылға арналған бастапқы жоспары мұнай өндіруді 98 миллион тонна деңгейінде көздеген болатын.
Елге келген шығын
Олжас Байділдиновтің айтуынша, жылдың жеті айында 5,4 миллион тоннаға жуық мұнай мен конденсаттың өндірілмей қалуы саланы миллиардтаған шығынға батырды.
«Баррель бағасы шартты түрде 80 доллар болғанда, бұл мұнай компаниялары мен республика кем дегенде 3,2 миллиард доллар ала алмады дегенді білдіреді. Ал газ өндіру мен мұнай-газ химиясы зауыттарында қайта өңдеу көлемінің төмендегенін ескерсек, бұл сома 3,5 миллиард доллардан асып түседі, оның үштен бірі — ел бюджетінің тікелей шығындары», — деп келтіреді сарапшының сөзін ИнфорTEK басылымы.
Байділдинов 2025 жылдың қорытындысы бойынша ҚР-да мұнай мен газ конденсатын өндіру көлемі 99,6 миллион тонна межесінде тоқтағанын еске салды. Ол кезде желтоқсан айындағы төмендеуге байланысты 100 миллион тонналық психологиялық межеге жету мүмкін болмады.
Іркілістердің себебі неде?
Сарапшының пікірінше, негізгі мәселелердің бірі — логистикалық тәуекелдер мен шикізатты сақтауға арналған меншікті инфрақұрылымның жоқтығы. Тіпті шілде айында Каспий құбыр консорциумының (КҚК) нысандарына жасалған шабуылдар мұнайды жөнелту мүмкін болмағандықтан және Қазақстанда жеткілікті көлемдегі резервуарлық парктердің жоқтығынан компанияларды мұнай өндіруді қайта азайтуға мәжбүр етті.
Бұл жағдай Теңіз кен орны максималды көрсеткіштерге (тәулігіне шамамен 1 миллион баррель) шыққанына және ҚР-дағы жалпы ең жоғары дегенде өндіру қуаты тәулігіне 2,2 миллион баррельге жеткеніне қарамастан орын алып отыр. Ағымдағы жылдың қорытындысы бойынша ел 100 миллион тонналық межені қайтадан бағындыра алмайтын сияқты.