​Қазақстандықтарға «Яндекс Доставканың» фейк сайты арқылы жасалатын алаяқтық туралы ескертілді

Киберқылмыскерлер Ресей мен Қазақстандағы хабарландыру сервистерін пайдаланушылардың ақшасын ұрлау үшін «Яндекс Доставканың» жалған сайттарын қолдана бастады.

F6 компаниясының мамандары осы алаяқтық схемасымен байланысты 20-дан астам ресурсты анықтады, деп хабарлайды ТАСС.

Алаяқтықтың екі сценарийі

Қылмыскерлер негізінен екі тәсілмен әрекет етеді:

1. Сатып алушы кейпінде: Алаяқ хабарландыруға жауап беріп, тауарды жеткізуді рәсімдеуді ұсынады. Содан кейін сатушыға жалған сайттың сілтемесін жібереді. Онда ақшаны якобы қабылдап алу үшін банк картасының деректерін және СМС-кодты енгізуді талап етеді.

2. Сатушы кейпінде: Сатып алушыға тауарды алғаннан кейін карта реквизиттерін жинайтын фейк төлем сервисі арқылы төлеуді ұсынады.

Жалған сайттар ресми сервиске өте ұқсас жасалып, атауында қатесі бар домендік есімдерді пайдаланады (мысалы, yandex-doctavym.website және dostavka-y.website). F6 мәліметінше, мұндай беттер арнайы Telegram-боттардың көмегімен жасалады.

Залал көлемі

Осы схема бойынша жұмыс істейтін топтарда 3 мыңнан астам пайдаланушы тіркелген. 2024 жылдың шілдесінен 2025 жылдың желтоқсанына дейін тек Ресей тұрғындарынан 1 млрд рубльден астам ақша ұрланған. Бір жәбірленушіге келтірілген орташа шығын 11 мың рубльді құрады. Қазақстандықтарға келтірілген шығын туралы нақты мәліметтер келтірілмейді.

Мамандар не ұсынады?

• Бейтаныс сатушылар мен сатып алушылар жіберген күмәнді сілтемелерге өтпеу;

• Жеткізуді тек ресми қосымша немесе сайт ішінде рәсімдеу;

• СМС арқылы келген растау кодтарын ешкімге айтпау (ақша аударымын қабылдап алу үшін СМС-кодты енгізу талап етілмейді).