В Атырау +32.3 
Атырау облысының Құрманғазы ауданында 15–16 тамыз күндері екі күндік Лотос фестивалі өтеді.
Жарияланған бағдарламаға сәйкес, қонақтарды концерттер, мәдени-көпшілік іс-шаралар, көрмелер, ұлттық ойындар және белгілі қазақстандық орындаушылар қатысатын гала-концерт күтіп тұр.
Алайда фестивальдің өткізілуі өңір тұрғындары арасында сауалдар туғызды. Мемлекеттік сатып алу деректеріне сәйкес, екі күндік шараны ұйымдастыруға 382 млн теңге қарастырылған.
Техникалық құжаттамада бағдарламаға қазақстандық эстрада жұлдыздарының өнер көрсетуі, ауқымды гала-концерт ұйымдастыру, алаңдарды безендіру, техникалық сүйемелдеу, мәдени-сауықтық іс-шаралар және басқа да қызметтер кіретіні жазылған.
Редакция Атырау облысы әкімдігіне ресми сауал жолдап, фестивальдің құны немен негізделгенін, 382 млн теңгеге нақты қандай шығындар кіретінін және неліктен мұндай көлемде бюджет қаржысы қажет болғанын түсіндіруді сұрады.
Алайда материал жарияланған сәтке дейін әкімдіктен жауап келмеді.
Ресми түсініктеменің болмауы әлеуметтік желілердегі талқылауларды күшейтті. Тұрғындар жолдардың жағдайы, коммуналдық инфрақұрылым және басқа да әлеуметтік мәселелер шешілмей жатқанда мұндай шығындардың қаншалықты орынды екенін білгісі келеді.
Редакция Атырау облысы әкімдігінің ресми жауабын алған бойда жариялауға дайын.
Айгүл Мансурова