В Атырау +35.5 
Каспий теңізінің түбімен тартылған суасты талшықты-оптикалық кабелі Қазақстан жағалауына жетті.
Осылайша, Ақтау мен әзірбайжандық Сумгайыт арасындағы цифрлық магистраль құрылысының ең күрделі кезеңі аяқталды, деп хабарлады Үкіметтің баспасөз қызметі.
Жаңа бағыт Қазақстан мен Әзербайжанның телекоммуникациялық инфрақұрылымын тікелей жалғастырып, Азия мен Еуропа арасындағы жоғары жылдамдықты деректерді беру арнасына айналуы тиіс.
Жоба 2025 жылы бастау алған болатын. Инженерлік зерттеулер мен кабельді сынақтан өткізгеннен кейін, оны теңіз түбімен жүргізу жұмыстары 2026 жылдың шілдесінде басталды. Құрылыс жұмыстары тәулік бойы су сыйымдылығы 20 мың тоннадан асатын мамандандырылған кеменің көмегімен жүргізілді. Жобаға 70 маман тартылды.
Қазір кабель жағалаудағы инфрақұрылымға қосылып жатыр. Күзде жерүсті нысандарының құрылысын аяқтау, іске қосу-баптау жұмыстарын жүргізу және жүйені сынақтан өткізу жоспарланған.
Магистраль құрылысы мен оны әрі қарай пайдалануға «Қазақтелеком» мен AzerTelecom International бірлескен кәсіпорыны — CaspiLink B.V. жауапты.
Жоба операторлардың өз қаражаты есебінен қаржыландырылуда, оны жүзеге асыруға бюджет ақшасы тартылған жоқ. Үкіметтің мәліметінше, жаңа желі халықаралық байланыстың сенімділігін арттырып, Қазақстанның транзиттік әлеуетін күшейтуі тиіс.
