В Атырау +35.6 
Қазақстанның Бас прокуратурасы БАҚ-та «Әділет» саяси партиясына қатысты жүргізілді делінген тексеріс туралы ақпаратты теріске шығарды.
Жалған мәліметтерді тарату фактісі бойынша сотқа дейінгі тергеп-тексеру басталды.
Қадағалау органының хабарлауынша, 4 тамызда кейбір бұқаралық ақпарат құралдары Бас прокуратураның атынан партия қызметіндегі тексеріс нәтижелері мен анықталған заңбұзушылықтар туралы пресс-релиз жариялаған.
«Бұл көрінеу жалған ақпарат болып табылады, Бас прокуратура мұндай сипаттағы хабарламаны жарияламаған, тексеру жүргізбеген.», — деп мәлімдеді ведомстводан.
Сотқа дейінгі тергеу ҚР Қылмыстық кодексінің 274-бабы 2-бөлігінің 3-тармағы (көрінеу жалған ақпарат тарату) бойынша жүргізіліп жатыр.
Бас прокуратура журналистер мен онлайн-платформа пайдаланушылары жарияланатын мәліметтердің шынайылығын тексеруге және жалған әрі заңға қайшы ақпаратты таратпауға міндетті екенін еске салды.
Ведомство азаматтарды тек Бас прокуратураның интернет-ресурсында орналастырылған ресми хабарламаларға сенуге шақырды.